Hvernig virka nýju bílastæðagjöld HÍ?

Haustönn Háskóla Íslands byrjar á mánu­dag­inn og sama dag tekur gjald­skylda gildi fyrir öll bíla­stæði háskóla­svæð­is­ins. Gjald­skyldan hefur lengi legið fyrir en hún er liður í sjálf­bærni­stefnu háskól­ans. „Þessari breyt­ingu er ætlað að bæta umferð og umhverfi á háskóla­svæð­inu og er gjald­töku stillt í hóf,“ stendur í til­kynn­ingu á vef HÍ.

HÍ birti í dag leið­bein­ingar um gjald­töku fyrir bíla­stæðin í Vatns­mýr­inni. Fyrstu vik­una gefst starfs­fólki og nem­endum tæki­færi til að kynna sér nýtt fyr­ir­komu­lag á bíla­stæðum háskól­ans og skrá sig í áskrift án þess að eiga á hættu að fá sekt.

Tveir flokkar bíla­stæða

Á háskóla­svæð­inu í Vatns­mýr­inni verða tveir flokkar stæða, skamm­tíma­stæði (H1) og lang­tíma­stæði (H2).

• H1 skamm­tíma­stæðin eru næst helstu bygg­ingum, oft þar sem áður hefur verið gjald­skylda. Þar gilda áskrift­ar­kort starfs­fólks og nem­enda ekki.
• H2 lang­tíma­stæðin eru hin bíla­stæðin á svæð­inu og þar getur starfs­fólk og nem­endur lagt með áskrift­ar­korti á 1.500 kr á mán­uði.

Bíla­stæða­kort HÍRauð­merkt eru samm­tíma­stæði og blá­merkt lang­tíma­stæði

Mynd: Háskóli Íslands

Gjald­takan (fyrir bæði H1 og H2) er 230 kr á klukku­stund á milli 7:00 og 17:00 alla virka dag. Fyrstu 15 mín­út­urnar eru þó alltaf gjald­frjálsar. Hægt er að greiða í greiðslu­vélum, gegnum Parka appið eða á greiðslu­síðu parka.is. Þar má einnig kaupa áskrift að lang­tíma­stæðum HÍ og bíla­stæðum á lóð Land­spít­al­ans.

Eftirlit fer fram með núm­era­plötu­lestri og ef ekki er greitt fyrir bíla­stæði fær eig­andi bíls rukkun í heima­banka sam­kvæmt tíma­gjaldi auk 2.500 kr þjón­ustu­gjalds.