Listamaðurinn Mouhamed Lo er með málverkasýningu í Iðu Zimsen til 5. nóvember næstkomandi en þar sýnir hann skemmtileg og lifandi málverk, akríl á striga. Sýningin heitir Tveir heimar. Mannlíf settist niður með Mouhamed og ræddi við hann um sýninguna og málaralistina.
Mouhamed ólst upp í Máritaníu, en settist að á Íslandi fyrir nærri því tveimur áratugum. Í lýsingu á sýningu hans segir að í verkum hans mætist tveir heimar í draumakenndum veruleika á tvívíðum fleti. Viðfangsefni Mouhamed er órætt en sjá má fugla, auk fleiri dýra, manna eða verum á mörkum andaheims og hins efnislega. Í lýsingunni segir einnig að verkin einkennist af tilraunastarfsemi og leikgleði.
Um er að ræða fyrstu málverkasýningu Mouhamed en hann hóf að mála árið 2021. „Ég er búinn að selja sex málverk úr sýningunni,“ segir Mouhamed með bros á vör í samtali við Mannlíf þar sem blaðamaður situr með listamanninum umkringdur bókum og málverkum á Iðu Zimsen með kaffiilminn í vitunum. Lo segist sækja innblástur að miklu leyti í náttúruna í verkum sínum. „Eins og hér,“ segir hann og bendir á málverk sem sýnir rauðhærða konu en verkið er í uppáhaldi hjá honum. „Þessi hugmynd kom til mín þegar ég var við sjóinn á Seltjarnarnesi þar sem ég bý. Fólk glímir oft við vandamál, er stressað og á erfitt, er einmanna eða hvað eina og það horfir til hafsins og líður betur. Það var það sem kom í huga mér þegar ég málaði þetta verk.“
Og það er fleira í náttúrunni sem veitir Mouhamed innblástur en oftar en ekki fær hann hugmyndir þegar hann er í göngutúrum og sér til dæmis klett sem kemur upp úr sjónum eða í raun hvað sem er sem hann sér í náttúrunni og vekur athygli hans. „Þá skissa ég upp mynd og fer síðan heim og reyni að gera málverk eftir skissunni,“ segir listamaðurinn brosandi.
En hvernig hafa viðtökurnar verið við fyrstu sýningu hans?
„Fólk hefur verið að segja að þetta séu góðar myndir hjá mér en ég veit ekkert hvort þetta sé gott eða slæmt, ég geri bara mitt besta.“
Sýningin er eins og áður segir í Iða Zimsen og er til 5. nóvember, aðgangur er ókeypis.
Athugasemdir