Kona frá Suður-Afríku opnar sig um mansal og nauðganir Epsteins

Hin 43 ára Juliette Bryant lýsir „ósýni­legum fjötrum“ sem héldu henni í greipum Jeffrey Epstein árum saman. Bryant var nemi og dreymdi um fyr­ir­sætu­feril þegar Epstein lokk­aði hana frá Höfða­borg í Suður-Afríku.

Bryant var ráðin af honum árið 2002, þá á fyrsta ári í háskóla­námi, og segir frá reynslu sinni á sama tíma og kallað er eftir því að Andrew Mountbatten-Windsor skýri tengsl sín við Epstein á þeim tíma sem hann gegndi hlut­verki við­skipta­full­trúa Bret­lands. Andrew hefur ítrekað neitað allri sök.

Aðeins tví­tug að aldri taldi Bryant að líf hennar væri á barmi stórra tæki­færa. „Mér fannst eins og draumar mínir væru að ræt­ast, því fjöl­skyldan mín átti í fjár­hags­erf­ið­leikum og ég vildi svo gjarnan gera eitt­hvað til að hjálpa,“ segir hún.

Þremur vikum eftir að hún hitti Epstein fyrst á veit­inga­stað í Höfða­borg var hún á leið til New York í fyrstu utan­lands­ferð sinni. Þar var Epstein ásamt Bill Clinton, sem var í opin­berri AIDS-vit­und­ar­her­ferð, í fylgd leik­ar­anna Kevin Spacey og Chris Tucker.

Skömmu eftir kom­una til New York var henni sagt að ferð­inni yrði haldið áfram til Karí­ba­hafs­ins. Ökumaður flutti hana að flug­braut á Tet­er­boro-flug­velli í New Jersey, þar sem hún steig um borð í einka­þotu Epsteins. Þar voru einnig konur sem hún segir hafa ráðið hana upp­haf­lega í Höfða­borg, á leið til einka­eignar hans.

„Hann klapp­aði á sætið við hlið sér … og ég sett­ist þar. Þetta var ótrú­lega rugl­ings­leg staða fyrir unga mann­eskju,“ sagði Bryant í sam­tali við Sky News. „Þegar flug­vélin fór á loft byrj­aði hann að þukla mig harka­lega á milli lær­anna og ég frík­aði algjör­lega út. Þá átt­aði ég mig á því, guð minn góður, fjöl­skyldan mín mun aldrei sjá mig aftur, þetta fólk gæti drepið mig.“

Hún segir að kon­urnar um borð hafi hlegið. „Ég var skelf­ingu lostin,“ bætir hún við. Bryant segir að hún hafi ekki verið seld áfram til ann­arra karla, heldur verið ítrekað nauðgað af Epstein sjálfum.

Ólíklegt er að hún hafi verið eina unga konan sem Epstein not­aði í man­sal frá Höfða­borg. Tölvu­póstar úr Epstein-skjöl­unum sýna flugupp­lýs­ingar ónefndra kvenna sem voru fluttar frá Höfða­borg til Lundúna, Atlanta og New York allt fram á síðla árs 2018. „Ég sá hann í morg­un­verði, hádeg­is­verði og kvöld­verði, og síðan var ég kölluð inn í her­bergið hans. Annars sá ég lítið til hans, hann var alltaf við vinnu,“ segir hún. „Ég var oft ein. Sat við sund­laug­ina eða las bækur. Ég fann líka einnota mynda­vélar í eld­hús­inu og tók myndir meðan ég var þar.“

Myndir Bryant sýna ann­ars vegar bros­andi augna­blik í faðmi ann­arra ungra kvenna og hins vegar drauga­legar myndir af ein­angrun og tóm­leika. „Það var engin leið að kom­ast burt. Þau voru með vega­bréfið mitt og við vorum komin til einnar af Karí­ba­hafs­eyj­unum og flutt í þyrlu á eyj­una hans. Það var engin und­an­komu­leið. Ég er ekki nógu sterk til að synda í burtu.“

Árið 2022 sagði Bryant í við­tali við Mirror að Ghislaine Maxwell hefði „opnað dyr hel­vítis“, eftir að Maxwell var dæmd í 20 ára fang­elsi.

Bryant lýsti einnig fyrir dómi martröðum sínum eftir að Maxwell hafði platað hana til Epstein þar sem hún var í tvö ár og sagði: „Í stuttu máli: hún er skrímsli.“

Á þeim tíma hvatti lög­mað­ur­inn Brad Edwards, sem tryggði Virginia Giuffre 12 millj­óna punda sátta­greiðslu utan dóms, FBI til að hætta ekki rann­sókn sinni.

Aðspurður um aðra sem gætu tengst Maxwell og Epstein sagði hann: „Vonandi verða þeir næstir á list­anum. Ef við fáum ein­hverju ráðið, þá mun það ger­ast.“ Hann naut þar stuðn­ings lög­manns­ins Spencer Kuvin, sem fer með mál nokk­urra fórn­ar­lamba Epsteins og Maxwell.