Gagnrýni fer nú vaxandi gegn sænska ungbarnavörumerkinu Frida Baby, sem er sakað um að nota kynferðislegar tvíræðar vísanir í auglýsingum og á umbúðum barnavara.
Vörumerkið, sem var stofnað í Svíþjóð og er nú selt víða um heim, meðal annars í Bandaríkjunum og Bretlandi, er þekkt fyrir vörur á borð við „Näsfrida“-snýtusuguna og „Windi“-pysventil“ fyrir ung börn.
Á samfélagsmiðlum hafa nú farið í dreifingu skjáskot af eldri, enskum auglýsingum og umbúðum fyrirtækisins. Þar er fyrirtækið sakað um að nota kynlífsbrandara í markaðssetningu á barnavörum.
Ein gagnrýnin færsla á X, sem hefur farið eins og eldur í sinu og verið skoðuð yfir 4,7 milljón sinnum, lýsir auglýsingunum sem „hræðilegum og viðbjóðslegum“.
Í einni eldri auglýsingu sést teiknuð rasskinn barns við endaþarmshitamæli, með textanum:
„Þetta er það næsta sem maðurinn þinn kemst trekanti.“
Á hlið pappírsumbúða hitamælisins stendur einnig:
„Hvað segirðu um sjortara?“
Í leiðbeiningum með einum af rakamælum fyrirtækisins má finna setninguna:
„Ég æsist auðveldlega.“
Eftir því sem gagnrýnin hefur aukist hafa fleiri eldri auglýsingar komið upp á yfirborðið. Í einni færslu er hugtakið „trekantur“ skilgreint svona:
„Trekantur: Þegar smábarnið þitt skríður upp í rúm og tekur 70 prósent af plássinu.“
Í annarri færslu, dagsettri 2. apríl 2020, sést barn með hor á enninu. Undir myndinni stendur:
„Það sem gerist ef þú dregur of hratt út,“ ásamt myllumerkinu „#dontmove“.
Í athugasemdum segja margir foreldrar að fyrirtækið hafi farið yfir strikið og að slíkur húmor eigi ekki heima í markaðssetningu á barnavörum. Sumir hafa jafnvel hvatt til sniðgöngu á vörum Frida Baby.
Sænski fréttamiðillinn Aftonbladet leitaði eftir viðbrögðum fyrirtækisins en í yfirlýsingu sem Frida Baby sendi nokkrum fjölmiðlum segir meðal annars:
„Frá upphafi hefur Frida notað húmor til að tala um raunverulegu, hráu og stundum óþægilegu hliðar foreldrahlutverksins, hluti sem oft er ekki rætt um. Við gerum það vegna þess að foreldrahlutverkið getur verið einangrandi og yfirþyrmandi, og stundum er léttleiki það sem gerir erfiðar aðstæður mannlegri, sameiginlegri og yfirstíganlegri.“
Yfirlýsingin heldur áfram:
„Vörur okkar eru ætlaðar börnum, en við höfum alltaf beint orðræðu okkar að þeim fullorðnu sem annast þau. Ætlun okkar hefur verið að gera vandræðalegar og erfiðar aðstæður auðveldari, heiðarlegri og minna einangrandi fyrir foreldra.“
Að lokum segir fyrirtækið að húmor sé einstaklingsbundinn:
„Það sem einum foreldri finnst fyndið getur verið of mikið fyrir annan. Við reynum aldrei að móðga, ögra til að vekja athygli eða gera fólk óþægilegt.“
Athugasemdir