Bandaríska dómsmálaráðuneytið er sakað um að hafa haldið eftir tugum blaðsíðna af skýrslum og glósum úr vitnaleiðslum í máli sem tengist meintum brotaþola hins látna kynferðisafbrotamanns Jeffrey Epstein. Samkvæmt Robert Garcia, þingmanni Demókrataflokksins frá Kaliforníu, sakaði vitnið Donald Trump um kynferðisofbeldi þegar hún var ólögráða.
Samkvæmt yfirliti yfir sönnunargögn sem tekið var saman fyrir réttarhöldin yfir Ghislaine Maxwell bendir margt til þess að alríkislögreglan (FBI) hafi tekið fjögur viðtöl við konuna árið 2019. Í opinberum gagnagrunni dómsmálaráðuneytisins um Epstein-málið hafi hins vegar aðeins fundist ein skýrsla um slíkt viðtal, að því er ABC News greinir frá.
Greining á yfirlitinu og þeim gögnum sem hafa verið birt bendir til þess að þrjár FBI-skýrslur, svokallaðar „302-skýrslur“, auk glósna úr þremur viðtölum hafi ekki verið gerðar opinberar. Um gæti verið að ræða yfir fimmtíu blaðsíður af efni.
Garcia, sem er leiðandi demókrati í eftirlitsnefnd fulltrúadeildar Bandaríkjaþings, segist hafa farið yfir óritskoðuð gögn hjá dómsmálaráðuneytinu á mánudag og komist að þeirri niðurstöðu að gögn tengd vitninu sem sakaði Trump um kynferðisofbeldi hefðu verið haldin eftir. Hann segir Demókrata ætla að hefja sérstaka rannsókn á málinu.
Dómsmálaráðuneytið hafnaði ásökununum í yfirlýsingu á samfélagsmiðlum og sakaði Demókrata um að „villa um fyrir almenningi og búa til uppgerða reiði“. Þar var því haldið fram að öll viðeigandi gögn hefðu verið afhent, nema þau féllu undir undantekningar, svo sem tvítekningar, trúnaðargögn eða efni sem tengdist áframhaldandi alríkisrannsókn.
Demókratar mótmæltu því og sögðu óskiljanlegt að FBI-viðtöl við meintan brotaþola gætu talist annaðhvort óþörf tvítekning eða trúnaðarmál. Þeir spurðu jafnframt hvort dómsmálaráðuneytið væri þar með að halda því fram að virk rannsókn stæði enn yfir á forsetanum.
Fyrstu fréttir af gögnunum komu frá sjálfstæða blaðamanninum Roger Sollenberger og NPR. Samkvæmt númerun skjala, svokölluðum Bates-númerum, virðist vera stórt bil í röð gagna sem birt voru opinberlega, sem bendi til þess að yfir 50 síður vanti.
Samkvæmt yfirliti dómsmálaráðuneytisins voru alls 15 skjöl afhent verjendum Maxwell sem tengdust vitninu. Þar á meðal voru fjórar FBI-skýrslur um viðtöl, glósur, ljósmyndir og önnur gögn. Í þeim gögnum sem dómsmálaráðuneytið birti opinberlega fyrr í þessum mánuði voru hins vegar aðeins sex skjöl, og aðeins ein viðtalskýrsla.
Hver var ásökunin?
Í júlí 2025, eftir að dómsmálaráðuneytið hafði tilkynnt að ekki yrðu birt frekari Epstein-skjöl, tóku FBI-menn saman kynningu um rannsóknir á Epstein og Maxwell. Þar var fjallað um alvarlegar ásakanir á hendur þekktum einstaklingum, þar á meðal Trump.
Samkvæmt Garcia, sem segist hafa séð óritskoðaðar útgáfur gagna, kom ásökunin frá sama vitni. Í kynningu FBI kom fram að Epstein hafi kynnt stúlkuna fyrir Trump, sem síðan hafi neytt hana til kynferðislegra athafna. Hún hafi brugðist við með því að bíta hann, í kjölfarið hafi Trump slegið hana og rekið hana út. Atvikið átti að hafa átt sér stað á árunum 1983 til 1985, þegar hún var á aldrinum 13 til 15 ára.
Innanhúss-tölvupóstur frá FBI í New York frá júlí 2025 greinir jafnframt frá því að eitt fórnarlamb hafi sakað Trump um misnotkun en síðar neitað að vinna frekar með yfirvöldum.
Í þeim eina FBI-viðtali sem birt hefur verið segir vitnið frá því að Epstein hafi boðið henni áfengi og vímuefni þegar hún var um 13 ára, eftir að hún hélt að hún væri ráðin í barnapössun. Hún segir að hún hafi ítrekað verið beitt kynferðisofbeldi og að í einu tilvikinu hafi tveir eldri menn verið viðstaddir og horft á.
Vitnið varð mjög miður sín í viðtalinu og gat ekki haldið áfram þann daginn. Áætlað var að halda áfram með fleiri viðtöl síðar – þau viðtöl virðast hins vegar ekki hafa verið birt.
Hvíta húsið vísaði fyrirspurnum um málið til fyrri yfirlýsingar dómsmálaráðuneytisins, þar sem fullyrt var að hluti gagnanna gæti innihaldið rangar eða ósannaðar ásakanir sem hefðu borist rétt fyrir forsetakosningarnar 2020. Þar var því haldið fram að ásakanirnar væru „tilhæfulausar og rangar“ og að þær hefðu annars þegar verið notaðar gegn Trump ef nokkur trúverðugleiki væri í þeim.
Epstein-skjölin
Nýjar Epstein-myndir sagðar sýna Andrew prins með ungum konum
Ný skjöl í Epstein-málinu innihalda ásakanir gegn Trump
Clinton segist ekki hafa átt í kynferðislegum samskiptum við konuna í pottinum
Myndband
Yfirlýsing Bills Clinton í Epstein-yfirheyrslu
Volæði Windsor-fjölskyldunnar
Athugasemdir