Íslenski handritshöfundurinn og leikstjórinn Katla Sólnes hefur hlotið einn virtasta handritsstyrk heims, svonefndan Nicholl-styrk Bandarísku kvikmyndaakademíunnar, fyrir handrit að kvikmynd í fullri lengd.
Styrkurinn er veittur af Kvikmyndaakademíunni í Hollywood og felur í sér bæði viðurkenningu á hæfileikum höfundar, auk handleiðslu og aðgangs að víðtæku tengslaneti innan kvikmyndaiðnaðarins.
Katla er jafnframt fyrsti handritshöfundurinn frá Norðurlöndunum sem hlýtur styrkinn frá upphafi, en hann hefur verið veittur frá árinu 1986.
Hún útskrifaðist með MFA-gráðu frá Columbia-háskóla í New York árið 2024 og hefur áður vakið athygli fyrir verk sín, meðal annars með viðurkenningum frá Alfred P. Sloan-sjóðnum. Þá var hún einnig valin í Sundance Screenwriters Lab, eina virtustu handritasmiðju heims.
Nicholl-styrkirnir hafa í gegnum tíðina reynst mikilvægur stökkpallur fyrir handritshöfunda. Meðal fyrri styrkþega er Susannah Grant, sem skrifaði síðar kvikmyndina Erin Brockovich og hlaut Óskarsverðlaunatilnefningu fyrir handritið.
Í ár var nýtt alþjóðlegt valkerfi tekið upp, þar sem yfir 500 meðlimir Akademíunnar komu að mati handrita í samstarfi við 40 kvikmyndaskóla og fagstofnanir víðs vegar um heiminn. Aðeins tveir aðrir handritshöfundar og tvö handritsteymi hlutu styrkinn að þessu sinni.
Í tilkynningu Akademíunnar segir að hópur styrkþega sé „óvenju sterkur, fjölbreyttur og alþjóðlegur hópur nýrra höfunda sem endurspegli framtíð frásagnarlistar“.
Handrit Kötlu ber vinnutitilinn Og jörðin klofnaði alelda (Eruption) og gerist á Íslandi snemma á áttunda áratugnum. Sagan fjallar um hjónaband tveggja jarðfræðinga sem fer að reyna á þegar metnaðarfullur starfsnemi frá Bandaríkjunum kemur inn í líf þeirra.
Framleiðsla myndarinnar verður í höndum Antons Mána Svanssonar fyrir framleiðslufyrirtækið STILL VIVID. Anton hefur áður komið að framleiðslu á kvikmyndum á borð við Hvítur, hvítur dagur, Hjartasteinn og Volaða land.
Athugasemdir