Mateusz Andrezej Korrczkowsk hefur verið dæmdur í tveggja ára fangelsi í Héraðsdómi Reykjaness fyrir stórfellt fíkniefnalagabrot eftir að hafa flutt til landsins 2 lítra af amfetamínbasa á vökvaformi.
Samkvæmt dómi flutti hann fíkniefnin til Íslands með flugi frá Lissabon í Portúgal til Keflavíkurflugvallar föstudaginn 13. mars 2026. Efnin voru falin í tveimur flöskum í farangri hans. Um var að ræða amfetamínbasa með 60 prósenta styrkleika sem samkvæmt ákæru var ætlaður til söludreifingar hér á landi í ágóðaskyni.
Korrczkowsk játaði sök við þingfestingu málsins. Fyrir dómi viðurkenndi hann að hafa samþykkt að flytja efnin til landsins gegn greiðslu. Hins vegar lá ekkert fyrir um að hann hefði átt fíkniefnin eða komið að skipulagningu innflutningsins með öðrum hætti.
Við ákvörðun refsingar leit dómurinn meðal annars til þess að Korrczkowsk hafði ekki áður gerst sekur um refsiverða háttsemi og að hann játaði brot sitt greiðlega. Á móti vó að um væri að ræða verulegt magn fíkniefna ætlað til dreifingar.
Þá var honum gert að greiða rúmlega 1,3 milljónir króna í sakarkostnað, þar á meðal verjendalaun og útlagðan kostnað ákæruvaldsins.
Athugasemdir