Demantadrottningin Dorrit Moussaieff, fyrrverandi forsetafrú Íslands, fagnar sigri popúlistaflokks Nigels Farage í sveitarstjórnarkosningunum í Bretlandi, með Facebook-færslu sem hún birti í morgun.
Á myndinni má sjá Dorrit halda um axlir hins umdeilda Nigel Ferage, sem brosir sínu breiðasta. Við færsluna skrifar hún: „Til hamingju, getum við nú öll snúið aftur til Bretlands?“ Ekki útskýrir hún frekar hvað hún á við en meðal þess sem Reform-flokkur Farage lofaði fyrir kosningarnar var mikil lækkun skatta en skattar á ríka fólkið hefur hækkað umtalsvert undir stjórn Verkamannaflokks Keir Starmers, undanfarin ár.
Tveggja flokka kerfið veikist
Sveitarstjórnarkosningarnar í Bretlandi sýna skýra veikingu Verkamannaflokksins undir forystu Keir Starmer, sem hefur tapað hundruðum sæta víðs vegar um landið. Á sama tíma hefur Reform UK, undir forystu Nigel Farage, styrkt stöðu sína verulega og unnið fjölda nýrra sæta, meðal annars í hefðbundnum vígum Verkamannaflokksins í norðurhluta Englands.
Úrslitin benda til þess að tveggja flokka kerfið í Bretlandi sé að veikjast, þar sem Íhaldsflokkurinn tapar einnig fylgi. Helsta áhyggjuefni kjósenda virðist vera hækkandi framfærslukostnaður, sem hefur haft áhrif á stuðning við ríkisstjórnina.
Kosningarnar eru taldar áfall fyrir Starmer og mikilvægt próf á forystu hans, en jafnframt merki um breytt pólitískt landslag þar sem nýir flokkar ná auknum áhrifum.
Umdeildur flokkur
Reform UK er umdeildur flokkur, fyrst og fremst vegna harðlínu-, popúlískrar og innflytjendafjandsamlegrar stefnu sinnar, sem oft er lýst sem öfgahægristefnu. Flokkurinn, undir forystu Nigel Farage, hefur sætt gagnrýni vegna hneykslismála frambjóðenda sem hafa falið í sér kynþáttafordóma/hómófóbísk ummæli, meint tengsl við öfgamenn og efnahagsstefnu sem sérfræðingar telja óraunhæfa.
Athugasemdir