Þrjátíu og þriggja ára maður var handtekinn í Hollandi í febrúar grunaður um að hafa hótað að myrða Katrínu Amalíu, erfingja hollensku krúnunnar, og systur hennar Alexíu prinsessu. Þetta kemur fram í frétt Aftonbladet.
Lögregla fann ýmsa óhugnanlega muni í fórum mannsins, meðal annars tvær axir með áletrununum „Alexia“, „Mossad“ og „Sieg Heil“. Þá fannst einnig handskrifað blað þar sem nöfn prinsessnanna voru skráð ásamt orðinu „blóðbað“.
Maðurinn er sagður tengjast nýnasískum hópum, en enn hefur ekkert skýrt tilefni fyrir fyrirhugaðri árás komið fram.
Þetta er ekki í fyrsta sinn sem Katrín Amalía verður fyrir hótunum. Árið 2022 var henni hótað af svokallaðri „Mocro-mafíu“, glæpasamtökum sem tengjast fíkniefnaviðskiptum í Hollandi og víðar í Evrópu.
Vegna hótananna þurfti prinsessan að yfirgefa námsmannabúð sína í Amsterdam aðeins nokkrum vikum eftir að hún hóf háskólanám og flytja aftur í höllina Huis ten Bosch Palace undir mikilli öryggisgæslu.
Síðar lauk hún hluta náms síns á Spáni undir vernd spænsku konungsfjölskyldunnar áður en hún sneri aftur til Hollands árið 2024 eftir að öryggisráðstafanir voru hertar.
Í viðtali árið 2023 sagði prinsessan að hún saknaði „venjulegs lífs“ og þess að geta einfaldlega gengið um götur eða farið í verslanir án ótta.
„Ég sakna eðlilegs námsmannalífs,“ sagði hún.
Faðir hennar, Vilhjálmur Alexander, sagðist eiga erfitt með að lýsa því hversu þungbært ástandið hefði verið fyrir fjölskylduna.
Frétt Aftonbladet rifjar einnig upp fjölda árása og hótana gegn evrópskum konungsfjölskyldum í gegnum tíðina. Þar á meðal var þegar Anna prinsessa varð fyrir mannránstilraun í Lundúnum árið 1974 og svaraði árásarmanninum með hinum frægu orðuð: „Not bloody likely!“ eða eins og það gæti útlagst á íslensku: „Ekki séns í helvíti!“
Einnig er rifjað upp þegar maður braust inn í svefnherbergi Elísabetar II árið 1982 í einu stærsta öryggishneyksli bresku konungsfjölskyldunnar.
Konungshallir víðs vegar um Evrópu hafa síðustu ár aukið öryggisráðstafanir verulega. Þar á meðal hafa verið settar upp flugvallarlíkar öryggisskoðanir við konungshöllina í Stokkhólmi og hærri hlið við Drottningholm-höllina í sömu borg.
Athugasemdir