Stjörnulögmaðurinn Sveinn Andri Sveinsson gagnrýnir harðlega umfjöllun Morgunblaðið um mögulegt áframhald aðildarviðræðna Íslands við Evrópusambandið í nýrri Facebook-færslu.
Í færslunni sakar hann blaðamenn Morgunblaðsins um að reyna að gera viðræðuferli ríkisstjórnarinnar tortryggilegt.
„Hinir keyptu blaðamenn Morgunblaðsins rembast eins og rjúpan við staurinn að gera hið gagnsæja viðræðuferli ríkisstjórnarinnar við ESB tortryggilegt,“ skrifar Sveinn Andri.
Hann bendir á að fyrirhugað ferli vegna hugsanlegrar ESB-aðildar sé skýrt kveðið á um í stjórnarsáttmála ríkisstjórnarinnar og byggi á tveimur þjóðaratkvæðagreiðslum.
„Stjórnarsáttmáli ríkisstjórnarinnar kveður á um að íslenzka þjóðin fái að ákveða það með þjóðaratkvæðagreiðslu hvort haldið verði áfram að ræða um aðild að Evrópusambandinu eða ekki. Verði það samþykkt, þá mun reyna á hvort viðunandi aðildarsamningur næst eða ekki,“ skrifar hann.
Hann segir að ef ríkisstjórnin telji hugsanlegan samning ásættanlegan verði hann lagður fyrir þjóðina í annarri atkvæðagreiðslu.
„Telji ríkisstjórnin fyrir sitt leyti að aðildarsamningur sé ásættanlegur, þá verður sá samningur borinn undir þjóðina í atkvæðagreiðslu nr. 2. Gagnsærra og lýðræðislegra verður það ekki.“
Sveinn Andri segir jafnframt ekkert óeðlilegt við að ráðherrar ræði þessi mál við erlenda leiðtoga.
„Það er ekkert að því að forystukonur ríkisstjórnarinnar greini í samtölum við evrópska þjóðarleiðtoga að þetta séu plön ríkisstjórnarinnar; allt í samræmi við stjórnarsáttmála.“
Að lokum segir hann að íslensk stjórnvöld þurfi ekki samþykki annarra fyrir slíkum samskiptum.
„Ríkisstjórn Íslands þarf hvorki samþykki frá Valhöll né Morgunblaðinu fyrir samtölum sínum við erlenda ráðamenn.“
Athugasemdir