Héraðsdómur Reykjavíkur hefur dæmt 22 ára mann, Brynjar Leó Hjartarson, í þriggja ára óskilorðsbundið fangelsi fyrir nauðgun og kynferðisbrot gegn stúlku, þegar hún var 13 og 14 ára gömul, auk annarra brota sem framin voru á árinu 2024 í Reykjavík.
Samkvæmt niðurstöðu dómsins hafði Brynjar Leó ítrekuð kynferðismök við stúlkuna. Dómurinn taldi sannað að hann hefði haft samræði og önnur kynferðismök við stúlkuna án samþykkis hennar og nýtt sér yfirburði sína vegna aldurs- og þroskamunar, auk þess sem hún hefði verið háð fíkniefnum og lyfjum.
Í dóminum kemur fram að stúlkan hafi verið í mjög viðkvæmri stöðu á þessum tíma. Hún var í forsjá Barnaverndar Reykjavíkur, hafði ítrekað strokið af vistheimili og var komin í alvarlega fíkniefnaneyslu. Dómurinn taldi að Brynjar Leó hefði skapað henni aðstæður til áframhaldandi neyslu og leynt henni fyrir lögreglu og barnavernd þegar hennar var leitað.
Auk kynferðisbrotanna játaði Brynjar Leó fíkniefnalagabrot, tilraunir til þjófnaðar, eignaspjöll og vopnalagabrot. Við handtöku hans fundust meðal annars Alprazolam- og OxyContin-töflur í fórum hans.
Við ákvörðun refsingar leit dómurinn meðal annars til þess að brotin hefðu staðið yfir um nokkurt skeið og beinst að lífi, heilsu og velferð barns. Þá var tekið fram að Brynjar Leó hefði sýnt af sér mikla ófyrirleitni og nýtt sér aðstæður brotaþola í eigin þágu.
Brotaþola voru dæmdar 2,5 milljónir króna í miskabætur auk vaxta. Þá var Brynjari Leó gert að greiða allan sakarkostnað, þar á meðal verjanda sínum og réttargæslumanni brotaþola samtals 3,8 milljónir króna í þóknun.
Athugasemdir