Áhorf á Eurovision-söngkeppnina hrundi víða um Evrópu í ár eftir umfangsmikla sniðgöngu vegna þátttöku Ísrael í keppninni, sem fram fór í Austurríki.
Samkvæmt fréttum dróst áhorf verulega saman í mörgum stærstu sjónvarpsmörkuðum Evrópu. Á Spáni, Ítalíu og Frakklandi var samdrátturinn sagður nema um 10 til 15 prósentum, á meðan áhorf í Belgíu, Bretlandi og Svíþjóð er sagt hafa hrunið um allt að 40 prósent.
Mikil gagnrýni hafði verið á þátttöku Ísraels vegna þjóðarmorðsins á Gaza og kröfðust fjölmargir listamenn, fjölmiðlar og aðgerðarsinnar þess að landinu yrði vísað úr keppni, líkt og Rússland var eftir innrásina í Úkraínu.
Fimm lönd ákváðu að sniðganga keppnina alfarið, Spánn, Írland, Holland, Slóvenía og Ísland.
Þrátt fyrir umrót og minna áhorf stóð Búlgaría uppi sem sigurvegari keppninnar í fyrsta sinn. Söngkonan Dara sigraði með laginu Bangaranga og hlaut alls 516 stig.
Ísrael hafnaði í öðru sæti með Noam Bettan og lagið Michelle, en áhorfendur í salnum létu óánægju sína í ljós með bauli meðan stigagjöfin fór fram.
Keppnin í ár hefur verið kölluð ein sú pólitískasta í sögu Eurovision og sú sem hafi staðið frammi fyrir stærstu samræmdu sniðgöngu í áratugi. Samband evrópskra sjónvarpsstöðva hefur verið sakað um tvöfalt siðgæði fyrir að útiloka Rússland frá keppninni en leyfa Ísrael áfram þátttöku.
Athugasemdir