Svikahrappar herja nú á áhrifafólk á Íslandi en Margrét Tryggvadóttir, fyrrum þingkona, rithöfundur og formaður Rithöfundasambands Íslands, birti spaugilega Facebook-færslu þar sem hún birtir skjáskot af tölvupósti sem sendur var út í hennar nafni. Þar segist „Margrét“ vera með hálsbólgu vegna berkjabólgu og því ekki geta talað í síma. Spyr síðan í kjölfarið hvort viðtakandi geti „gert eitthvað“ fyrir sig.
Halla Gunnarsdóttir, formaður VR, skrifar athugasemd og bendir á að svikahrappar hafi einnig sent tölvupóst í nafni forseta ASÍ, Finnbjörn A. Hermannsson, með nákvæmlega eins tölvupósti.
Halla skrifar í gríni:
„Forseti ASÍ er í svipuðum gír. Meira hálsbólguvesenið á ykkur. Ég er boðin og búin til að aðstoða!“
Margrét svarar að bragði:
„Gott að heyra. Við Finnbjörn förum kannski bara saman í sóttkví og þú tekur einkafundina.“
Þá tjáir sig einnig ritari Hugarafls, Sigrún Huld Sigrúnar og segir svipaða pósta hafa verið senda á marga úr starfshópi Hugarafls.
Halldór Auðar Svansson, fyrrum borgarfulltrúi og varaþingmaður Pírata veit sitthvað um tölvur en hann telur að um sé að ræða sjálfvirka svikapósta.
„Væntanlega alveg sjálfvirkt. Einhver svindlbotti sem finnur fólk sem er í einhvers konar stjórnunarstöðum og sendir út pósta í nafni þess til að reyna að svíkja út peninga.“
Athugasemdir