Lögregla handtók mann og flutti annan á slysadeild eftir meinta skotárás á Kársnes um og eftir hádegi í dag.
Agnes Eide Kristínardóttir, yfirlögregluþjónn á rannsóknarsviði lögreglunnar á höfuðborgarsvæðinu, staðfestir við RÚV að grunur sé um að annar mannanna hafi skotið hinn í höndina.
Hún segir að skotvopn hafi fundist á vettvangi, þó ekki hafi enn verið staðfest hvort það sé vopnið sem notað var í árásinni. Málið er nú til rannsóknar hjá lögreglu.
Íbúar í hverfinu segjast hafa heyrt skothvell fyrr um daginn. Einn þeirra sagði að sér hefði ekki dottið í hug að um skothvell væri að ræða fyrr en lögregla mætti á staðinn.
Annar nágranni sagði að mikið partíhald hefði verið í húsinu um nóttina þar sem handtakan fór síðar fram. Hann sagðist hafa heyrt hróp um hjálp og síðan hvell, en ekki áttað sig á því fyrr en lögreglan mætti að líklega hefði verið um skot að ræða.
Þriðji viðmælandi fréttastofu RÚV sagðist einnig hafa heyrt hvellinn.
Samkvæmt heimildum var blóð sjáanlegt á hurð að stigagangi hússins.
Fyrr í dag greindi Vísir frá því að blóðugur maður hefði komið inn í bakaríið Brikk við Hafnarbraut og sagt starfsfólki að hann hefði verið skotinn í höndina. Hann var með handklæði vafið utan um höndina.
Lögregla sendi fjölmennt lið á vettvang, þar á meðal að minnsta kosti fjóra lögreglubíla og þrjá bíla frá Sérsveit ríkislögreglustjóra, sem yfirleitt er kölluð út þegar grunur leikur á um vopnaburð.
Maður var leiddur út úr húsinu í handjárnum og sást lögregla leita í görðum í nágrenninu. Þá var svæði við einn stigagang afmarkað með lögregluborða.
Athugasemdir