Úthlutun úr Starfslaunasjóði sjálfstætt starfandi fræðimanna fyrir árið 2026 hefur farið fram en alls hlutu 15 fræðimenn styrki til metnaðarfullra verkefna á fjölbreyttum fræðasviðum. Þetta kemur fram í tilkynningu frá stjórnvöldum.
Alls bárust 50 gildar umsóknir í sjóðinn og var því umtalsverð samkeppni um styrkina, en hlutfall styrktra verkefna nam 30 prósentum. Sótt var um starfslaun til samtals 408 mánaða, sem samsvarar rúmlega 236 milljónum króna, en úthlutað var rúmum 45 milljónum króna líkt og árið áður.
Starfslaun sjóðsins nema í ár 580 þúsund krónum á mánuði, en um verktakagreiðslur er að ræða. Með hækkun mánaðargreiðslna milli ára um 20 þúsund krónur samsvarar úthlutunin alls 78 starfslaunamánuðum.
Starfslaunasjóður sjálfstætt starfandi fræðimanna heyrir undir menningar-, nýsköpunar- og háskólaráðuneytið og hefur það hlutverk að styðja við störf fræðimanna sem starfa sjálfstætt innan sinna fræðigreina. Rétt til að sækja um starfslaun eiga meðal annars höfundar fræðirita, handbóka, orðabóka og annars viðamikils upplýsingaefnis á íslensku.
Í sjóðnum er hægt að sækja um starfslaun til þriggja, sex, níu eða tólf mánaða. Fram kemur að stjórn sjóðsins hafi þurft að hafna fjölda verkefna sem þóttu styrkhæf vegna mikillar eftirspurnar eftir fjármagni.
Athugasemdir