Lögreglan hafði í nógu að snúast í nótt og í gærkvöldi vegna fjölbreyttra verkefna, meðal annars vegna ölvunarástands, umferðarlagabrota og innbrots.
Tilkynnt var um mann sem kastaði steinum í bifreiðar og var hann handtekinn á vettvangi. Samkvæmt upplýsingum lögreglu var maðurinn verulega ölvaður og því vistaður í fangageymslu.
Þá var lögreglu tilkynnt um rúðubrot í skóla. Við athugun kom í ljós að svo virtist sem ekki hefði verið farið inn í húsnæðið. Lögregla gerði viðeigandi ráðstafanir á vettvangi.
Lögregla stöðvaði einnig ökumann sem grunaður var um akstur án ökuréttinda. Hann reyndist bæði vera ljóslaus og að nota farsíma undir stýri. Við nánari athugun kom í ljós að maðurinn hafði aldrei öðlast ökuréttindi.
Lögregla var jafnframt kölluð til vegna umferðaróhapps þar sem einhver meiðsli voru tilkynnt. Samkvæmt fyrstu upplýsingum voru meiðslin þó talin minniháttar.
Annar ökumaður var stöðvaður grunaður um akstur undir áhrifum áfengis. Sá hafði verið mældur á 122 kílómetra hraða á klukkustund þar sem hámarkshraði er 80 kílómetrar á klukkustund. Þá sagðist ökumaðurinn hafa neytt fíkniefna skömmu áður. Hann var látinn laus að lokinni blóðsýnatöku.
Þá var ökumaður stöðvaður vegna gruns um akstur sviptur ökuréttindum.
Einnig barst tilkynning um innbrot í hverfi borgarinnar. Lögregla mætti fljótt á vettvang en innbrotsþjófurinn var á bak og burt þegar að var komið.
Loks var ökumaður stöðvaður grunaður um akstur undir áhrifum fíkniefna og var hann látinn laus að lokinni sýnatöku.
Athugasemdir