Eyjólfur Ármannsson innviðaráðherra hefur gert breytingar á reglugerð um ökuskírteini sem fela meðal annars í sér að læknisvottorðs verður ekki lengur sjálfkrafa krafist vegna endurnýjunar ökuskírteinis fyrr en við 75 ára aldur. Áður tók sú krafa gildi við 65 ára aldur.
Fram kemur í tilkynningu frá stjórnvöldum að breytingin hafi verið unnin í samvinnu við heilbrigðisráðuneytið og sé markmið hennar að einfalda umsóknarferlið og gera það mannlegra og nútímalegra. Heilbrigðisráðuneytið bendir á að heilsa fólks hafi almennt batnað samhliða hækkandi lífaldri og að reynslan sýni að læknisvottorð hafi nær undantekningalaust verið samþykkt hjá þessum aldurshópi við endurnýjun ökuskírteina.
Þá er talið að breytingin muni draga úr álagi á heilbrigðiskerfið með því að fækka óþarfa vottorðaskrifum heimilislækna og auðvelda eldri ökumönnum ferlið við endurnýjun ökuréttinda.
Áfram gildir þó meginregla umferðarlaga um að ökumenn skuli ávallt tryggja að þeir séu líkamlega og andlega færir um að stjórna ökutæki.
Fleiri breytingar voru einnig gerðar á reglugerðinni. Þar á meðal færast tímamörk til að ljúka verklegu ökuprófi úr sex mánuðum í tólf mánuði eftir að bóklegt próf hefur verið staðist. Þá er kveðið á um fimm ára gildistíma starfsleyfa ökuskóla og skýrari reglur um endurmenntun atvinnubílstjóra.
Athugasemdir