Þungarokkshátíðin Sátan, sem haldin er árlega í Stykkishólmi fyrstu helgina í júní, hefur tilkynnt fyrstu hljómsveitirnar sem munu stíga á svið á hátíðinni árið 2027. Um er að ræða tvær áhrifamiklar sveitir í sögu íslensks þungarokks, HAM og Drýsil.
HAM snýr aftur á hátíðina eftir eftirminnilega frammistöðu á fyrstu Sátunni árið 2024 þegar sveitin lokaði laugardagskvöldinu. Frá stofnun hennar árið 1988 hefur HAM verið meðal fremstu rokksveita landsins og haft veruleg áhrif á þróun íslenskrar rokktónlistar. Sveitin nýtur mikillar virðingar meðal tónlistaráhugafólks og telst meðal mikilvægustu hljómsveita íslenskrar rokksögu.
Einnig hefur verið staðfest að Drýsill muni koma fram á hátíðinni. Sveitin markaði tímamót í íslenskri þungarokkssögu þegar hún gaf út plötuna Welcome to the Show árið 1985 með Eirík Hauksson í fararbroddi. Platan er almennt talin fyrsta íslenska þungarokksbreiðskífan og hefur skipað mikilvægan sess í sögu íslenskrar tónlistar.
Þrátt fyrir að ferill Drýsils hafi verið stuttur hefur áhrifamáttur sveitarinnar verið mikill. Sveitin kom síðast saman árið 2005 þegar hún hitaði upp fyrir Megadeth á Nasa í Reykjavík. Með tónleikunum á Sátunni 2027 mun Drýsill snúa aftur á svið eftir 22 ára hlé.
Platan Welcome to the Show var gefin út í afar takmörkuðu upplagi, eða um 666 eintökum. Vegna þess hve fá eintök voru framleidd hefur hún orðið eftirsótt safngripur meðal tónlistarsafnara og getur selst fyrir allt að 100 þúsund krónur á erlendum safnara- og uppboðsvefjum.
Skipuleggjendur Sátunnar segja það mikinn heiður að fá bæði HAM og Drýsil til þátttöku og telja komu þeirra marka sterka byrjun á kynningu dagskrár hátíðarinnar fyrir árið 2027.
Athugasemdir