Stefán Pálsson sagnfræðingur vakti athygli á ástandi göngu- og hjólastíga í borginni í opinberri færslu. Hann nefnir nýlegan göngu- og hjólastíg á milli Eskihlíðar og Skógarhlíðar, sem hafi verið stór og dýr framkvæmd. Mörgum mánuðum eftir að stígurinn var tekinn í notkun vantar enn að klára verkið alveg.
„Þetta finnst mér alltaf svo skrítið...
Hér í götunni gerði borgin þennan sallafína göngu- og hjólastíg sem tengir Eskihlíðina og Skógarhlíðina og sem lengi hafði verið kallað eftir. Þetta var nokkuð drjúg framkvæmd og tók alveg sinn tíma. En mörgum mánuðum síðar stendur enn eitt örlítið verkefni eftir: að steypa agnarlítinn bút af gangstéttinni. Það væri punkturinn yfir i-ið.“
Stefán segir þetta furðulega algengt í borgarlandinu. Framkvæmdir séu kláraðar að 98% en litlar „innansleikjur“ skildar eftir mánuðum saman. Hann líkir þessu við „að hleypa af stað uppþvottavélinni en skilja einn óhreinan disk eftir í vaskinum“.
„Þetta er furðulega algengt þegar kemur að framkvæmdum í borgarlandinu. Þær eru kláraðar 98%, en einhverjar örlitlar innansleikjur skildar eftir og ekki kláraðar fyrr en löngu síðar. Þetta er dálítið eins og að hleypa af stað uppþvottavélinni en skilja einn óhreinan disk eftir í vaskinum...“
Eldri kona flutt á sjúkrahús eftir fall í Rimahverfi
Alvarlegt slys var í Rimahverfi þegar Soffía Jóhannesdóttir, 93 ára íbúi á hjúkrunarheimilinu Eir, var á leið í klippingu. Soffía var í hjólastól og var honum ýtt áfram af aðstoðarmanni þegar framhjól stólsins festist í djúpri sprungu á illa farinni gangstétt. Við það steyptist Soffía fram fyrir sig og féll á andlitið.
Sjúkrabíll var kallaður á vettvang og var hún flutt á sjúkrahús til rannsóknar. Soffía slapp við beinbrot og heilahristing en hlaut talsverða áverka og er marin í andliti. Lögreglan mætti einnig á staðinn og tók skýrslu af atvikinu.
Athugasemdir