Héraðsdómur Reykjavíkur hefur dæmt Askalín Birgisdóttur í fjögurra mánaða skilorðsbundið fangelsi fyrir fjölda brota sem framin voru á árunum 2024 til 2026, þar á meðal ítrekuð þjófnaðarbrot, fíkniefnalagabrot, húsbrot og brot gegn valdstjórninni.
Málið var rekið á grundvelli tveggja ákæra sem síðar voru sameinaðar. Annars vegar var Askalín ákærð fyrir að hafa sparkað í vinstri fót lögreglumanns við skyldustörf í Reykjavík 30. maí 2025. Hins vegar laut hin ákæran að röð annarra brota sem framin voru á tímabilinu frá október 2024 til apríl 2026.
Samkvæmt ákæru braust hún 24. október 2024 inn í kjallaraíbúð í Reykjavík með því að brjóta rúðu og hafði á brott með sér 2.205 evrur. Sama dag fann lögregla í fórum hennar samtals 29 OxyContin-töflur og 43 Rivotril-töflur sem hún hafði ekki heimild til að hafa undir höndum.
Fjórum dögum síðar, 28. október 2024, var hún ákærð fyrir að hafa ruðst í heimildarleysi inn í húsnæði í Reykjavík.
Í apríl 2025 var hún sökuð um að hafa stolið unaðsvörum úr verslun Elko í Skeifunni að verðmæti 112.149 króna.
Á fyrstu dögum ársins 2026 héldu brotin áfram samkvæmt ákæru. Þann 2. janúar stal hún snyrtivörum úr Krónunni í Skógarlind að verðmæti 2.216 króna. Fjórum dögum síðar var hún sökuð um að hafa stolið tveimur bankakortum, hvítu veski, ökuskírteini, Costco-korti og 10.000 krónum úr húsnæði Sýslumannsins á höfuðborgarsvæðinu í Hlíðasmára í Kópavogi. Þá var hún einnig ákærð fyrir að hafa stolið matvörum úr Krónunni í Jafnaseli í Reykjavík í apríl 2026.
Askalín játaði skýlaust öll brotin og var það meðal þess sem dómurinn taldi henni til málsbóta. Dómurinn tók einnig mið af því að nokkur tími var liðinn frá því sum brotanna voru framin og að dráttur á rannsókn og útgáfu ákæru yrði henni ekki kennt um.
Við ákvörðun refsingar leit dómurinn jafnframt til sakaferils hennar. Hún hafði áður gengist undir lögreglustjórasátt vegna fíkniefnabrots árið 2017 og hlotið tvo skilorðsbundna fangelsisdóma, annars vegar árið 2019 vegna hlutdeildar í húsbroti og gripdeild og hins vegar árið 2022 fyrir þjófnað, fíkniefnabrot og umferðarlagabrot. Samkvæmt sakavottorði hafði hún staðist skilorð í báðum tilvikum.
Refsingin var ákveðin fjögurra mánaða fangelsi en fullnustu hennar var frestað til tveggja ára gegn því skilyrði að hún haldi almennt skilorð á því tímabili.
Athugasemdir