Lögreglan á höfuðborgarsvæðinu hafði í nógu að snúast vegna umferðarlagabrota, innbrots og annarra útkalla í gærkvöldi og í nótt.
Samkvæmt dagbók lögreglu voru líkamsárásirnar sjö tilkynntar á varðsvæði lögreglustöðvar eitt, sem nær meðal annars yfir miðborg Reykjavíkur. Ekki koma fram frekari upplýsingar um árásirnar eða hvort einhver hafi slasast alvarlega.
Tilkynning barst einnig um hóp ungmenna í miðborginni og átti einn úr hópnum að hafa verið með hníf. Þá var lögregla kölluð út vegna samkvæmishávaða.
Tilkynnt var um innbrot í heimahús og var einn handtekinn vegna málsins. Hann var vistaður í fangageymslu þar til unnt verður að taka af honum skýrslu.
Lögregla og slökkvilið voru jafnframt kölluð að fjölbýlishúsi vegna vatnsleka. Þá var óskað eftir aðstoð lögreglu á bráðamóttöku vegna manns sem neitaði að yfirgefa staðinn. Vísa þurfti manninum á brott.
Fjöldi ökumanna var stöðvaður vegna gruns um akstur undir áhrifum áfengis eða vímuefna. Þrír voru stöðvaðir grunaðir um ölvunarakstur og ók einn þeirra Hopp-bifreið. Þá var einn ökumaður stöðvaður án ökuréttinda.
Í öðrum tilvikum voru þrír ökumenn stöðvaðir grunaðir um akstur undir áhrifum vímuefna. Einn þeirra hafði verið sviptur ökuréttindum og var bifreið hans með röng skráningarnúmer. Fleiri ökumenn voru einnig stöðvaðir vegna gruns um vímuefnaakstur.
Sex ökumenn voru stöðvaðir fyrir of hraðan akstur og reyndist einn þeirra einnig vera ölvaður.
Loks stöðvaði lögregla ökumann sem ók á negldum vetrardekkjum. Lögregla gerði létt grín að veðurfarinu í dagbókinni en minnti jafnframt á gildandi reglur.
„Þó sumarið hafi ekki verið eftir vonum á höfuðborgarsvæðinu minnir lögregla á að tímabil nagladekkja hefst ekki fyrr en 1. nóvember,“ segir í dagbók lögreglu.
Athugasemdir