Forstöðumaður sakar Reykjavíkurborg um vanhugsaðar breytingar

Mikil ólga er á vett­vangi frí­stunda­heim­ila og félags­mið­stöðva í Reykja­vík eftir að umfangs­miklar skipu­lags­breyt­ingar voru knúnar í gegn í skjóli borg­ar­ráðs. Haf­steinn Bjarna­son, for­stöðu­maður félags­mið­stöðv­ar­innar 105, segir starf­semi í þágu barna og ung­menna í alvar­legri óvissu og sakar borg­ar­yf­ir­völd um skeyt­ing­ar­leysi og sam­ráðs­leysi.

„Í vik­unni varð starf mitt flókn­ara og erf­ið­ara,“ segir Haf­steinn í upp­hafi færslu sinnar. Hann lýsir því hvernig næsti yfir­maður hans, deild­ar­stjóri, hafi verið sagt upp og boðið annað, illa skil­greint starf, auk þess sem fjár­mála­stjóri hafi verið rek­inn. „Þetta eru tvær mann­eskjur sem að ég leita hvað mest til í mínu starfi, sem for­stöðu­maður félags­mið­stöðvar, eftir aðstoð.“

Frístundamiðstöðvar lagðar af með einu pennastriki

Breyt­ing­arnar fela í sér að frí­stunda­mið­stöðvar borg­ar­innar hafa verið lagðar niður, en Haf­steinn hefur starfað hjá sinni mið­stöð í níu ár. Hann bendir á að þessar mið­stöðvar hafi staðið að gríð­ar­lega mik­il­vægum verk­efnum í þágu almenn­ings. Nefnir hann sér­stak­lega stofnun Flotans – vett­vangs­starfs félags­mið­stöðva, sem sinnir m.a. gæslu­hlut­verki á menn­ing­arnótt, auk Hinsegin félags­mið­stöðv­ar­innar og ann­arra mik­il­vægra verk­efna fyrir börn og ung­linga. Aðrar frí­stunda­mið­stöðvar borg­ar­innar, sem státa af svip­uðum störfum, voru sömu­leiðis lagðar niður og nýtt fyr­ir­komu­lag tekur nú við. Haf­steinn gefur lítið fyrir und­ir­bún­ing­inn:

„Allt var þetta gert að því er virð­ist að illa ígrund­uðu máli og ekki áttað sig á afleið­ingum.“

Óttast lakari þjónustu og meira álag

Haf­steinn ótt­ast að þegar verk­efnum fjár­mála­stjóra og deild­ar­stjóra er dreift á færri hendur muni vinnu­á­lag á for­stöðu­menn og aðra starfs­menn aukast óhóf­lega, sem muni á end­anum bitna á gæðum þjón­ust­unnar. „Hver tekur þeirra bolta? Þeir fara á hendur færri aðila sem verður til þess að ein­stak­lingar falla á milli hluta. Þjónusta verður lak­ari fyrir vikið. Fólk á að hlaupa hraðar og vinna verk­efni sem að er ekki í þeirra starfs­lýs­ingu. For­stöðu­menn eru þar á meðal,“ varar hann við.

Þótt hann skilji að stundum þurfi að end­ur­móta skipu­rit, segir hann vinnu­brögðin algjör­lega óásætt­an­leg. „Ekkert sam­tal var haft við vett­vang­inn. Ekki neitt! Hlutir gerðir í skjóli borg­ar­ráðs sem hefur rétt til að hrinda svona breyt­ingum án umræðu í fram­kvæmd í ljósi ákvæðis um fram­kvæmd­ar­rétt innan sum­ar­tíma­bils.“

„Á bak við tölur er fólk“

Haf­steinn seg­ist blöskra að svona starfs­hættir líð­ist hjá jafn stórum vinnu­stað og Reykja­vík­ur­borg er. Hann minnir stjórn­mála­menn á að mann­legi þátt­ur­inn gleym­ist oft í hag­ræð­ing­ar­að­gerðum. „Á bak við tölur er fólk. Það að breyta mínus í plús ger­ist ekki á einni nóttu og það þarf að vanda til verka. Hér var það ekki gert.“

Að lokum gagn­rýnir hann mál­flutn­ing póli­tíkusa í fjöl­miðlum sem full­yrða að breyt­ing­arnar muni ekki leiða til þjón­ustu­skerð­ingar.

„Póli­tíkusar sem standa fyrir þessum breyt­ingum voga sér svo að mæta í við­töl og segja að engin þjón­ustu­skerð­ing muni verða vegna þess­ara breyt­inga. Á end­anum bitna þessar ákvarð­anir á börnum okkar og ung­mennum.“

Að sögn Haf­steins er staðan á vett­vangi þung og ein­kenn­ist af óvissu: „Eftir situr svo skelk­aður vett­vangur frí­stunda­heim­ila og félags­mið­stöðva sem að vill ekk­ert nema gott gera fyrir sína þjón­ustu­þega, íbúa Reykja­vík­ur­borgar.“