Kona hefur verið dæmd í tveggja mánaða skilorðsbundið fangelsi í Héraðsdómi Reykjavíkur fyrir brot gegn valdstjórninni og kynferðislega áreitni. Konan var sakfelld fyrir að hafa gripið um kynfæri lögreglumanns þegar verið var að færa hana í fangaklefa á lögreglustöðinni við Hverfisgötu í Reykjavík.
Atvikið átti sér stað í nóvember árið 2023. Konan hafði verið handtekin vegna brots gegn lögreglusamþykkt Reykjavíkur og flutt á lögreglustöðina. Samkvæmt gögnum málsins var hún æst og óstýrilát við komuna, fylgdi ekki fyrirmælum lögreglu og viðhafði bæði fúkyrði og kynferðislegt tal í garð lögreglumanna.
Þegar færa átti konuna í fangaklefa neitaði hún að fara þangað sjálfviljug. Tveir lögreglumenn tóku þá hvor um sína hönd hennar og leiddu hana inn í klefann. Samkvæmt framburði brotaþola losnaði önnur hönd konunnar úr taki hans og greip hún þá utan um kynfæri hans utanklæða og kreisti nokkuð fast. Lögreglumaðurinn kvaðst hafa verið aumur í eistum í nokkurn tíma eftir atvikið.
Konan neitaði sök bæði við rannsókn málsins og fyrir dómi. Hún sagðist muna illa eftir atvikum vegna ölvunar en hafnaði því alfarið að hafa gripið um kynfæri lögreglumannsins. Þá sagðist hún ekki hafa haft ásetning til að eiga í átökum við lögreglu eða sýna af sér óviðeigandi kynferðislega hegðun.
Myndbandsupptökur úr fangageymslunni voru meðal sönnunargagna í málinu. Á þeim sást hönd konunnar losna úr taki lögreglumannsins og hún þreifa í átt að kynfærum hans. Ekki sást með skýrum hætti hvort hún greip um kynfæri hans en á annarri upptöku mátti sjá viðbrögð lögreglumannsins. Dómurinn taldi upptökurnar styðja framburð hans. Þá heyrðist konan viðhafa kynferðislegt tal við lögreglumenn og sást reyna ítrekað að sparka til þeirra.
Dómurinn taldi framburð lögreglumannsins og annarra lögreglumanna trúverðugan og studdan öðrum gögnum málsins. Var talið sannað hafið yfir skynsamlegan vafa að konan hefði gripið um kynfæri lögreglumannsins og að háttsemin hefði verið framin af ásetningi. Hún var því sakfelld fyrir brot gegn valdstjórninni og kynferðislega áreitni.
Við ákvörðun refsingar var meðal annars horft til þess að tæp þrjú ár voru liðin frá brotinu og að konunni yrði ekki kennt um þann drátt sem orðið hafði á meðferð málsins. Dómurinn taldi dráttinn ámælisverðan. Þá hafði konan ekki brotið af sér eftir atvikið, eftir því sem séð varð.
Refsing hennar var ákveðin tveggja mánaða fangelsi en fullnustu refsingarinnar frestað og fellur hún niður að tveimur árum liðnum haldi konan almennt skilorð. Henni var jafnframt gert að greiða tæplega 698 þúsund krónur í málsvarnarlaun.
Athugasemdir