Matthías Már Magnússon, dagskrárstjóri Rásar 2, hefur greinst með krabbamein í ristli sem hefur dreift sér í lifrina. Hann greindi sjálfur frá veikindunum í færslu á Facebook í morgun.
Matthías segir að aðdragandinn hafi hafist fyrir um tveimur vikum þegar hann leitaði á bráðamóttöku vegna mikils orkuleysis.
„Fyrir tveim vikum endaði ég á Bráðamóttökunni sökum orkuleysis, var einhvern veginn alveg búinn á því. Í kjölfarið fór ég í hinar ýmsu rannsóknir en það fyrsta sem kom í ljós var mikið blóðleysi og grunur um einhvers konar innvortis blæðingu,“ skrifar Matthías.
Hann fékk í kjölfarið blóð og járn og segist hafa hresstst nokkuð við það. Frekari rannsóknir leiddu hins vegar í ljós alvarlega orsök veikindanna.
„Eftir nokkra daga á ganginum á Bráðamóttökunni fannst sökudólgurinn. Krabbamein í ristli. Við tóku nánari rannsóknir sem nú hafa leitt í ljós að þetta krabbamein hefur dreift sér í lifrina,“ segir Matthías.
Í færslunni þakkar hann jafnframt fjölskyldu og vinum fyrir þann mikla stuðning sem hann og eiginkona hans, Auður, hafa fengið síðustu daga. Fólk hafi meðal annars aðstoðað þau við barnapössun, fært þeim mat og þrifið heimili þeirra.
Matthías segir hjónin afar þakklát fyrir alla þá aðstoð, kveðjur og sáluhjálp sem þeim hafi borist á þessum erfiða tíma.
Fram undan er nú meðferð og barátta við sjúkdóminn og er Matthías ákveðinn í að takast á við verkefnið af krafti.
„Nú tekur við barátta sem við ætlum okkur að sigra.“
Athugasemdir