Skógræktarfélag Suðurnesja lýsir eftir trjábolum sem teknir voru úr skjólvegg í Sólbrekkjuskógi á dögunum. Félagið greinir frá málinu í færslu á samfélagsmiðlum og segir óprúttna aðila hafa haft trjábolina á brott.
Grisjað var í Sólbrekkjuskógi í sumar og var hluti þess viðar sem féll til kurlaður. Bæjarstarfsmenn nýttu jafnframt trjáboli úr skóginum til þess að reisa skjólvegg.
Skjólveggurinn hafði mikilvægu hlutverki að gegna enda getur verið vindasamt á Suðurnesjum. Að sögn Skógræktarfélagsins getur skjól haft úrslitaáhrif á það hvort tré nái að lifa af og dafna við slíkar aðstæður.
Mikil vinna fór í að koma skjólveggnum upp en fyrir skömmu kom í ljós að einhverjir höfðu tekið trjáboli úr honum og haft á brott. Félagið fer ekki í grafgötur með afstöðu sína til verknaðarins og kallar þá sem þar voru að verki „bölvaða þjófa“ í færslunni.
Skógræktarfélagið biðlar nú til almennings um að hafa augun opin og lætur gamminn geisa með þeim sem kunna að hafa tekið bolina.
„Sjái lesandinn einhvern vera að reisa sér bjálkakofa eða álíka þessa dagana má gjarnan láta Skógræktarfélagið eða lögregluna vita,“ segir í færslunni.
Athugasemdir