Héraðsdómur Norðurlands eystra hafði aðeins birt 17 af 50 dómum sem kveðnir höfðu verið upp á árinu þegar staðan var könnuð 18. ágúst. Alls voru því 33 dómar óbirtir, þrátt fyrir reglur um birtingu dóma. Þetta kemur fram í fréttaskýringaþættinum Þetta helst á RÚV.
Meðal óbirtra dóma voru sakamál vegna líkamsárása, kynferðisbrota og annarra alvarlegra brota. Þar á meðal var dómur vegna sprengingar í Múlagöngum, máls sem vakti mikla athygli á sínum tíma. Fimm árum eftir sprenginguna höfðu engar opinberar upplýsingar komið fram um niðurstöðu málsins.
Þegar RÚV leitaði skýringa hjá dómstólnum var vísað til mikils álags og manneklu. Í kjölfar fyrirspurna fréttastofunnar og þess að málið var tekið upp við Dómstólasýsluna voru 29 dómar birtir á vef Héraðsdóms Norðurlands eystra fyrir 26. ágúst. Sumir þeirra höfðu þá legið óbirtir mánuðum saman.
Samkvæmt reglum á almennt að birta dóma í sakamálum innan fimm virkra daga, en í ákveðnum tilvikum má birting bíða í allt að 14 virka daga.
Kristín Haraldsdóttir, framkvæmdastjóri Dómstólasýslunnar, segir mikið álag hafa verið hjá dómstólnum á Akureyri en að það réttlæti ekki stöðuna.
„Við erum ekki ánægð með hlutfall á borð við þetta, alls ekki og það á ekki að vera þannig,“ segir Kristín.
Sambærileg vandamál hafa áður komið upp. Árið 2022 voru til að mynda aðeins fimm af 37 dómum Héraðsdóms Norðurlands vestra birtir. Dómstólasýslan skoðar nú hvort nýta megi gervigreind til að auðvelda hreinsun dóma fyrir opinbera birtingu.
Athugasemdir