Sigríður Á. Andersen, þingmaður Miðflokksins, kallaði eftir því á Alþingi í dag að utanríkisráðherra Íslands tjáði sig um fréttir þess efnis að mynd af ráðherranum hefði birst á skiltum í Teheran í Íran.
Sigríður ræddi málið undir liðnum störf þingsins og hóf mál sitt á að minnast árásanna á Ísrael 7. október 2023. Hún sagði nákvæmlega þrjú ár liðin frá því að heimurinn hefði vaknað við hryllingsfréttir af árásunum.
„Það eru nákvæmlega þrjú ár síðan heimurinn vaknaði upp við hryllingsfréttir frá Ísrael,“ sagði Sigríður og vísaði til árásanna þar sem um 1.200 manns voru drepnir. Hún sagði Ísrael hafa verið í stríði frá þeim degi og kvaðst vonast til þess að nú sæi fyrir endann á átökunum. Athygli vekur að Sigríður tók ekki fram að síðan þá hafi her Ísrael drepið rúmlega 74 þúsund Palestínumenn samkvæmt Reuters og AP.
Þá eru Amnesty International, ísraelsku mannréttindasamtökin B'Tselem og óháð rannsóknarnefnd Sameinuðu þjóðanna meðal þeirra sem hafa komist að þeirri niðurstöðu að Ísrael hafi framið þjóðarmorð á Gaza. Alþjóðadómstóllinn hefur hins vegar ekki kveðið upp endanlegan dóm um hvort Ísrael beri lagalega ábyrgð á þjóðarmorði.“
Gagnrýnir viðbrögð utanríkisráðherra
Sigríður beindi því næst sjónum sínum að framgöngu Þorgerðar Katrín Gunnarsdóttur, utanríkisráðherra Íslands, gagnvart Ísrael. Hún vísaði til nýlegs þings Sameinuðu þjóðanna og sagði ráðherrann hafa séð sig knúinn til að gagnrýna forsætisráðherra Ísraels vegna ákalls hans um að fulltrúar ríkja sætu undir ræðu hans.
„Á þingi Sameinuðu þjóðanna á dögunum fann hæstv. utanríkisráðherra Íslands sig knúinn til þess að atyrða forsætisráðherra Ísraels fyrir það eitt að vera með ákall um það á þingi Sameinuðu þjóðanna að fulltrúar ríkja Sameinuðu þjóðanna sætu undir ræðu hans. Hæstv. utanríkisráðherra Íslands sá sig knúinn til að atyrða forsætisráðherra Ísraels fyrir þetta.“
Þá vék Sigríður að fréttum um að utanríkisráðherra Íslands hefði birst á skiltum í Teheran. Hún lýsti undrun sinni yfir málinu og sagði Íran vera helsta stuðningsríki Hamas.
„Um helgina vaknaði ég upp við frétt sem ég trúði jafn illa og ég trúði hryllingsfréttunum fyrir þremur árum,“ sagði Sigríður og vísaði þar til skiltanna.
Hún sagði Þorgerði Katrínu ekki hafa viljað tjá sig um málið og kallaði eftir því að það yrði gert.
„Ég kalla eftir því að utanríkisráðherra Íslands tjái sig um þetta mál,“ sagði Sigríður.
Hún lauk máli sínu með harðri gagnrýni og sagðist sjálf ekki myndu sætta sig við að mynd af henni væri notuð með þessum hætti í Íran.
„Sjálf myndi ég ekki una mér hvíldar fyrr en þetta skilti í Íran, hjá klerkastjórninni og þeim brjálæðingum sem þar stjórna, með ljósmynd af sjálfri mér hefði verið tekið niður.“
Athugasemdir