Mótmæli gegn fyrirhuguðu sjókvíaeldi verða haldin samtímis á Austurvelli og Seyðisfirði í dag. Aðstandendur segja baráttuna snúast um meira en framtíð eins fjarðar og spyrja hversu mikið samráð sé í raun haft við íbúa.
Samtímis mótmæli gegn fyrirhuguðu sjókvíaeldi í Seyðisfirði verða haldin á Austurvelli í Reykjavík og á Seyðisfirði í dag klukkan 15. Samkomurnar verða tengdar með beinni útsendingu og sameiginlegri dagskrá.
Alls hafa 13.145 einstaklingar skrifað undir áskorun um verndun Seyðisfjarðar. Aðstandendur mótmælanna segja að í sex ár hafi íbúar staðið gegn áformum fiskeldisfyrirtækisins Kaldvíkur um sjókvíaeldi í firðinum, en fyrirtækið sé í eigu norsku Måsøval-fjölskyldunnar í gegnum eignarhaldsfélagið Heimstø og tengdra aðila.
Í fréttatilkynningunni aðstandenda segir að Kaldvík vilji hefja eldi á 10 þúsund tonnum af fiski í firðinum, þrátt fyrir andstöðu um 75 prósenta íbúa samkvæmt könnunum.
Segja álitamál ekki hafa stöðvað leyfisveitingar
Aðstandendur mótmælanna benda á að á undanförnum sex árum hafi verið gerðar kannanir meðal íbúa, undirskriftum safnað, haldnir íbúafundir og sendar inn umsagnir. Þá hafi ýmis álitamál verið sett fram um náttúruvernd, lífríki, siglingaöryggi, þjóðaröryggi og réttindi íbúa og landeigenda.
Þrátt fyrir það hafi stjórnvöld veitt leyfi fyrir 10 þúsund tonna sjókvíaeldi í firðinum.
Samkvæmt tilkynningunni hefur enginn ráðherra sem fer með málaflokkinn viljað mæta á mótmælin til að taka við undirskriftunum. Jóhann Páll Jóhannsson umhverfis-, orku- og loftslagsráðherra mun þó taka við þeim á morgun klukkan 11.
„Hvers virði er samráð ef ekki er hlustað?“
Aðstandendur mótmælanna segja Seyðisfjörð orðinn táknmynd stærri spurninga um lýðræði, náttúruvernd og almannahagsmuni.
Þeir telja að málið snúist ekki aðeins um framtíð fjarðarins heldur einnig um hvaða fordæmi verði skapað fyrir önnur samfélög sem vilja vernda náttúru sína og hagsmuni komandi kynslóða.
Þeir spyrja meðal annars hvers virði samráð sé ef ekki sé hlustað á sjónarmið íbúa og hversu þungt almannahagsmunir vegi þegar þeir rekist á fjárhagslega sérhagsmuni.
„Ef þetta vígi fellur, þrátt fyrir sex ára baráttu heimamanna, eindregna andstöðu samfélagsins og þúsundir undirskrifta, vakna áleitnar spurningar um hver ráði í raun ferðinni þegar ákvarðanir eru teknar um náttúruauðlindir landsins. Hvers virði er samráð ef ekki er hlustað? Og hversu þungt vega almannahagsmunir þegar þeir rekast á fjárhagslega sérhagsmuni?“
Dagskrá á Austurvelli
Mótmælin eru haldin í samstarfi Landverndar, Verndarsjóðs villtra laxastofna (NASF) og Vá! – Félags um vernd fjarðar, ásamt breiðfylkingu náttúruverndarsamtaka.
Katrín Oddsdóttir lögfræðingur stýrir dagskránni á Austurvelli. Þar flytja Þorgerður María Þorbjörnsdóttir, formaður Landverndar, og Dýri Jónsson, Seyðfirðingur og athafnamaður, ávörp. Hljómsveitin Eva kemur einnig fram og streymt verður beint frá aðgerðum á Seyðisfirði.
Dagskráin á Austurvelli stendur í um 40 mínútur.
Mótmælin hefjast klukkan 15 í dag.
Athugasemdir