Hjálmtýr Heiðdal, formaður félagsins Ísland-Palestína, gagnrýnir Hannes Hólmstein Gissurarson harðlega fyrir ummæli hans um mótmæli og óeirðir í Frakklandi. Í Facebook-færslu sem hann nefnir „Alhæfingar Hannesar Hólmsteins“ segir Hjálmtýr prófessorinn reyna að telja fólki trú um að öfgavinstrisinnar og öfgamúslimar standi að baki mótmælunum.
„Hannes Hólmsteinn fer mikinn á samfélagsmiðlum og reynir að telja fólki trú um að öfgavinstrisinnar og ögfgamúslimar standi að baki mótmælunum í Frakklandi og óeirðunum sem fylgja í kjölfarið,“ skrifar Hjálmtýr.
Hann segir mótmæli ekki aðeins fara fram í Frakklandi heldur einnig í Portúgal, á Ítalíu, Spáni og í Albaníu.
„Það er fyrst og fremst verið að mótmæla niðurskurði í menntamálum og almannaþjónustu auk hækkandi vöruverðs sem ný-frjálshyggjan ber í skauti sér,“ skrifar Hjálmtýr og bætir við að það sé einmitt sú stefna sem Hannes Hólmsteinn „beri fyrir brjósti“.
Hann er harðorður í garð Hannesar og segir alhæfingar hans um mótmælendur vera „bara bull til að blekkja“.
Segir engar vísbendingar um að fyrirtæki gyðinga hafi verið sérstök skotmörk
Hjálmtýr gagnrýnir sérstaklega fullyrðingar Hannesar um að fyrirtæki í eigu gyðinga hafi verið eyðilögð í óeirðunum en verslunum í eigu múslima hlíft.
„Hannes fullyrðir ítrekað að fyrirtæki í eigu gyðinga hafi verið eyðilögð en verslunum í eigu múslima hafi verið hlíft,“ skrifar hann.
Í færslunni vísar Hjálmtýr til upplýsinga sem hann segir koma frá lögreglu og stofnunum gyðingasamfélagsins í París. Hann segir að hvorki lögreglan né stofnanir gyðinga hafi fundið vísbendingar um að samkunduhús eða fyrirtæki í eigu gyðinga hafi verið sérstaklega valin sem skotmörk vegna gyðingahaturs.
Hann vísar meðal annars til öryggisþjónustu gyðingasamfélagsins í Frakklandi, SPCJ (Service de Protection de la Communauté Juive), og löggæsluyfirvalda.
Samkvæmt Hjálmtý hafi fyrstu fullyrðingar um að óeirðaseggir hefðu farið eftir listum yfir heimilisföng í eigu gyðinga eða vísvitandi hlíft fyrirtækjum í eigu múslima birst á samfélagsmiðlum og í óstaðfestum fréttum.
„SPCJ og yfirvöld á staðnum komust að þeirri niðurstöðu að þessar fullyrðingar ættu sér enga stoð í raunveruleikanum,“ skrifar Hjálmtýr.
Vísar til 800 þúsund mótmælenda og 2.000 verslana
Hjálmtýr bendir á umfang mótmælanna og ringulreiðina sem fylgir þeim. Í færslunni nefnir hann um 800.000 mótmælendur og að skemmdarverk hafi verið unnin á um 2.000 verslunum víðs vegar um Frakkland.
Hann telur því ekki réttlætanlegt að fullyrða að fyrirtæki hafi verið valin sem skotmörk vegna trúarbragða eigenda þeirra án þess að sannanir liggi fyrir.
Athugasemdir