Wimbledon er elsta og virtasta tennismót í heimi og er mótið eitt af fjórum stóru risamótunum (e. Grand Slam) sem fram fara árlega á grasvöllum All England Club í úthverfi London. Mótið er þekkt fyrir strangar hefðir, þar á meðal að leikmenn klæðist eingöngu hvítum fötum.
Síðasta Wimbledon-mótið fór fram dagana 29. júní til 12. júlí 2026 þar sem Ítalinn Jannik Sinner vann einliðaleik karla annað árið í röð eftir sigur gegn Alexander Zverev í úrslitaleiknum. Í einliðaleik kvenna sigraði hin tékkneska tenniskona Linda Nosková.
Einn af föstum liðum mótsins er áhorfandinn bresk-bandaríska leikkonan og fyrirsætan Sienna Miller en leikkonan hefur hlotið mikið lof fyrir einstaklega gott auga fyrir tísku og hafa ljósmyndarar keppst um að ná myndum af henni.
Sienna Miller sló fyrst í gegn snemma á 2000-áratugnum og hefur leikið í fjölda vinsælla kvikmynda, þar á meðal Layer Cake, Alfie, Factory Girl og American Sniper.
Glæsileg sólgleraugu, stóru beltin og boho- chic kjólarnir á Glastonbury-hátíðinni hafa verið mörgum innblástur í gegnum tíðina.
Eftir að hafa eignast sitt þriðja barn í maí og tilkynnt trúlofun sína í júní væri skiljanlegt ef stjarnan vildi taka sér hlé frá sviðsljósinu í sumar en hún hefur verið dyggur Wimbledon-aðdáandi og gefur sér alltaf tíma fyrir tennis. Sienna-aðdáendum til mikillar gleði mætti Miller í stúkuna í vor/sumar 26-línunni frá Alexander McQueen með skartgripi frá Hirsh London og Burberry-sólgleraugu.
Ef litið er til fyrri ára er hægt að sjá glæsilegan stíl hennar. Meðal annars hvíti Galvan-samfestingurinn sem hún klæddist árið 2015 og ljósbrúnu sumarjakkafötin úr hör sem hún paraði við mjög lága hæla árið 2019. Hún hefur aldrei verið mikið fyrir flatbotna skó og árið 2023 mætti hún á meistaramótið í röndóttum hörjakkafötum og himinháum plateauskóm. Í fyrra fór Sienna aftur í ræturnar og mætti í boho-pilsi og stuttum hekluðum topp.
Þar sem mótinu er lokið ætlum við að líta til baka á nokkrar af hennar helstu tískusprengjum.
