Frönsk yfirvöld hafa handtekið 15 ára ungling sem grunaður er um að hafa kveikt skógareld sem varð tveimur slökkviliðsmönnum að bana í síðasta mánuði. AFP greinir frá þessu og hefur upplýsingarnar eftir heimildarmanni sem tengist rannsókn málsins.

Slökkviliðsmennirnir tveir létust 21. júlí þegar þeir börðust við skógareld nærri flugvellinum í Bordeaux í vesturhluta Frakklands. Þeir voru staddir í slökkvibifreið þegar eldurinn umkringdi bifreiðina og komust þeir ekki undan logunum.

Samkvæmt heimildarmanni AFP hefur unglingurinn nú formlega verið settur í rannsókn vegna gruns um að hafa komið eldinum af stað. Hann hefur jafnframt verið úrskurðaður í gæslu á stofnun fyrir ungmenni á meðan rannsókn málsins stendur yfir.

Dauði slökkviliðsmannanna tveggja hefur vakið mikla reiði meðal franskra slökkviliðsmanna. Þriðji slökkviliðsmaðurinn, sem starfaði sem sjálfboðaliði, lést við að berjast við annan skógareld í suðausturhluta landsins.

Stéttarfélög slökkviliðsmanna hafa gagnrýnt stjórnvöld harðlega og segja slökkvilið landsins ekki búa yfir nægilegum mannafla og búnaði til að takast á við þann mikla fjölda skógarelda sem geisað hefur í Frakklandi á þessu ári.

Fulltrúar níu stéttarfélaga funduðu í gær með Laurent Nunez, innanríkisráðherra Frakklands. Að fundinum loknum sögðu fulltrúarnir þær skuldbindingar sem ráðherrann hefði gefið ekki ganga nægilega langt. Þeir hafa hótað verkfallsaðgerðum í september verði ekki brugðist frekar við kröfum þeirra.

Á sama tíma glímir Frakkland við nýja hitabylgju og voru slökkviliðsmenn á fimmtudag við störf á nokkrum stöðum í landinu þar sem skógareldar loguðu.