Héraðsdómur Reykjavíkur hefur dæmt 17 ára pilt í 60 daga fangelsi, skilorðsbundið til tveggja ára, fyrir alvarlegt umferðarslys sem olli rafhlaupahjólanotanda stórfelldum meiðslum auk umfangsmikils fíkniefnalagabrots.
Málið varðar annars vegar umferðarslys sem átti sér stað 21. nóvember 2024 á gatnamótum Sæbrautar og Snorrabrautar í Reykjavík. Samkvæmt ákæru ók pilturinn bifreið gegn rauðu ljósi og lenti á einstaklingi sem var á rafhlaupahjóli og ók yfir gatnamótin á grænu gönguljósi.
Afleiðingar slyssins voru mjög alvarlegar. Brotaþoli hlaut meðal annars nefbeinabrot, áverkaloftbrjóst, mörg rifbrot, áverka á milta, brot á hluta lendahryggs og mjaðmagrindar, auk opinna sára á andliti og áverka á hjarta.
Hins vegar var pilturinn einnig ákærður fyrir að hafa 9. mars 2025 haft í vörslum sínum fíkniefni í sölu- og dreifingarskyni. Við leit lögreglu í bifreið hans fundust meðal annars yfir 216 grömm af kannabisblönduðu efni, kókaín, ketamín, marijúana, LSD, Alprazolam-töflur og kannabisvökvi. Þá fundust einnig 203 þúsund krónur í reiðufé sem talið var tengjast fíkniefnasölu.
Ákærði játaði sök skýlaust við meðferð málsins. Við ákvörðun refsingar leit dómurinn meðal annars til þess að hann var aðeins 17 ára þegar brotin voru framin, hafði ekki áður gerst sekur um refsiverða háttsemi og játaði brotin tafarlaust.
Þrátt fyrir alvarleika brotanna taldi dómurinn rétt að fresta fullnustu refsingarinnar og láta hana falla niður að tveimur árum liðnum, að því gefnu að hann haldi almennt skilorð.
Jafnframt voru fíkniefnin, Apple iPhone-sími og 203 þúsund krónur gerð upptæk. Bótakrafa hins slasaða var skilin frá sakamálinu og verður tekin fyrir í sérstöku einkamáli síðar.
