Aðstandendur Secret Solstice hafa tilkynnt um nýja tónlistar- og menningarhátíð næsta sumar undir nafninu Iceland Eclipse. Hátíðin verður haldin í samstarfi við bandaríska fyrirtækið Immersive Experiences, í kringum almyrkvann 12. ágúst. Besta sjónarhornið á almyrkvann mun vera á Vesturlandi, svo hátíðin verður haldin á Hellissandi en búist er við mörgum ferðamönnum á svæðinu á þessum tíma.
Kári Viðarsson frá Hellissandi og Jón Bjarni Steinsson, einn skipuleggjenda, ræddu um hátíðina á Bítinu á Bylgjunni í morgun. Þeir segja tónlistarhátíðina ólíka Secret Solstice á marga vegu þar sem hún verður ekki rokkhátíð og áhersla verður lögð á menningarhátíðina samhliða. „Fyrir þá sem þekkja, ímyndaðu þér Burning Man á Snæfellsnesi … það verður jógakennsla og hugleiðslutjöld, fyrirlestrar og alls konar vinnustofur.“
Burning Man er alræmd hátíð sem hefur verið haldin árlega á mismunandi stöðum í eyðimörk Bandaríkjanna í nokkra áratugi. Upptök hátíðarinnar var hjá grasrótarlistamönnum í San Fransisco sem komu saman í kringum hugmyndir um sjálfbærni, umburðarlyndi, anarkisma og listræna sköpun. Áratugum seinna hafa skilaboð hátíðarinnar verið útþynnt. Nú flykkjast milljarðamæringar frá Silicone Valley á hátíðina á einkaþotum sínum, svo sem Elon Musk og Mark Zuckerberg. Aðgerðasinnar hafa mótmælt harðlega neikvæðu umhverfisáhrifum hátíðarinnar undanfarin ár og segja rætur hátíðarinnar hafa glatast.
Miðarnir á hátíðina verða hámark 5.000 og búist er við að þeir verði nokkuð dýrir. Dagskrá hátíðarinnar mun fara fram 12.-15. ágúst 2026 og fjölbreytt gistirými verða í boði svo sem tjaldsvæði, húsbílar og gistirými. Að sögn Kára og Jón Bjarna hafa viðtökurnar verið góðar hjá íbúum Hellisands og Snæfellsbæ.
Secret Solstice var haldin í Laugardalnum frá 2014 til 2019. Tónlistarhátíðin var vinsæl en var þó ekki óumdeild. Íbúar í nærumhverfi hátíðarinnar kvörtuðu undan hávaða og fíkniefnamál voru tíð á hátíðinni.
Vinsældir Secret Solstice döluðu þegar í ljós koma að margir listamenn og verktakar hefðu ekki fengið greitt frá Solstice Productions, fyrirtækinu á bak við hátíðina. Fremst var þar bandaríska rokkhljómsveitin Slayer sem stefndi Solstice Productions fyrir að greiða hljómsveitinni ekki fyrir framkomu þeirra á Secret Solstice árið 2018. Solstice Productions varð gjaldþrota árið 2021 með 337 milljónir króna í skuldum.
