Einn lést og 11 slösuðust eftir troðning í stúkunni meðal stuðningsmanna alsírska knattspyrnufélagsins Mouloudia Club d'Alger á laugardag í Algeirsborg, að því er kemur fram í tilkynningu frá yfirvöldum í Alsír.

Mouloudia Club d'Alger hafði nýverið tryggt sér meistaratitilinn í Alsír í annað sinn í röð og í níunda skiptið í sögu félagsins, en hátíðarhöldin breyttust í harmleik að leik loknum.

„Stuðningsmenn féllu úr efri stúkunni með þeim afleiðingum að einn lést og ellefu slösuðust,“ sagði í færslu frá yfirvöldum á samfélagsmiðlum, þar sem einnig kom fram að tíu sjúkrabílar hefðu verið sendir á vettvang.

Samkvæmt íþróttavefnum La Gazette du Fennec hrundi öryggishlið sem varð til þess að fjöldi aðdáenda féll niður á neðri stúkuna.

Stade du 5 Juillet leikvangurinn var þéttsetinn þegar Mouloudia Club d'Alger, sem eru ríkjandi meistarar, gerðu markalaust jafntefli við NC Magra.

Vegna harmsins ákvað Alsírska knattspyrnudeildin að aflýsa opinberri verðlaunaafhendingu bikarsins.