Bandaríski áhrifavaldurinn Ash Trevino átti að sögn saksóknara í samskiptum eða samböndum við tugi fanga í Texas á undanförnum árum. Sumir þeirra afplána dóma fyrir alvarlega ofbeldisglæpi, þar á meðal morð og vopnuð rán.
Þetta kemur fram í dómsskjölum sem bandaríski miðillinn TMZ hefur undir höndum vegna máls Trevino, sem hefur verið ákærð fyrir velferðar- og heilbrigðissvik.
Samkvæmt gögnum saksóknara er talið að Trevino hafi átt í samböndum við um 50 til 75 fanga sem vistaðir eru í fangelsum í Texas. Saksóknarar segja fanganna afplána dóma fyrir ýmis ofbeldisbrot, meðal annars gróf rán og morð.
Í málsgögnunum er einnig fjallað um starfsemi Trevino á samfélagsmiðlum. Saksóknarar saka hana meðal annars um að hafa óskað eftir fjárframlögum frá fylgjendum sínum á TikTok gegn því að birta upplýsingar um heilsufar einstaklings sem var á hennar framfæri. Þá er einnig vísað til þess að hún hafi birt kynferðislega gróft efni og staðið fyrir beinum útsendingum af svipuðum toga á samfélagsmiðlum.
Trevino var handtekin í desember árið 2025. Hún greiddi tryggingu og var látin laus en var handtekin á ný í mars á þessu ári vegna meintra brota á skilyrðum lausnarinnar.
Hún var ákærð fyrir velferðarsvik og heilbrigðissvik.
Trevino játaði brotin fyrir dómi í vikunni og komst þar með hjá frekari fangelsisvist. Hún var dæmd til tveggja ára eftirlits í samfélaginu og gert að sinna 120 klukkustundum af samfélagsþjónustu.
Þá þarf hún að sækja námskeið sem ætlað er að koma í veg fyrir þjófnað og fá fjármálaráðgjöf. Jafnframt var henni gert að endurgreiða ríkinu tæplega 16.800 Bandaríkjadali vegna málsins.
Trevino hefur vakið töluverða athygli á samfélagsmiðlum undanfarin ár og byggt upp stóran hóp fylgjenda, meðal annars á TikTok.
