Þrír einstaklingar voru handteknir í kjölfar alvarlegrar líkamsárásar við Valhallarbraut í Reykjanesbæ í nótt. Samkvæmt upplýsingum frá Lögreglunni á Suðurnesjum var einn maður fluttur á sjúkrahús með stungusár en hann er ekki talinn vera í lífshættu.

Tilkynning um atvikið barst lögreglu klukkan 02:40. Þegar lögreglumenn komu á vettvang var þar fjöldi fólks samankominn utandyra. Fljótlega var óskað eftir frekari aðstoð viðbragðsaðila eftir að upplýsingar bárust um að einstaklingar væru vopnaðir hnífum.

Sérsveit ríkislögreglustjóra var kölluð til aðstoðar við aðgerðir lögreglu á vettvangi. Við rannsókn málsins voru þrír menn handteknir vegna gruns um aðild að árásinni.

Að sögn lögreglu særðust tveir einstaklingar í átökunum. Annar þeirra hlaut stungusár en hinn skarst á hendi. Ekki hafa frekari upplýsingar verið veittar um ástand hins síðarnefnda.

Málið er nú til rannsóknar hjá Lögreglunni á Suðurnesjum og er rannsókn þess á frumstigi. Lögregla hyggst fara fram á gæsluvarðhald yfir hinum handteknu síðar í dag í þágu rannsóknarinnar.