Vélstjórinn grínaktugi, Anna Kristjáns fylgist vel með fréttum eins og margir Íslendingar en hún las frétt Mannlífs frá því um helgina af bresku glæpakvendi sem talið er að sé í felum í núverandi heimabæ Önnu, Los Cristianos á Tenerife.
Í nýjustu dagbókarfærslu sinni segist Anna hafa fengið fyrirspurn í gær á netinu hvort hún hefði séð til glæpakvendisins.
„Ég hefi greinilega ekki fylgst nógu vel með ástandinu á eyjunni að undanförnu því um eftirmiðdaginn í gær fékk ég fyrirspurn á netinu hvort ég hefði séð eitthvað til breskrar konu sem hafði stolið 300.000 sterlingspundum frá gamalli konu og fengið dóm að sér fjarstaddri, en það hefði frést af henni hér í Los Cristianos.“
Eftir að Anna las frétt Mannlífs ákvað hún að skoða staðarmiðlana og komst að því glæpakvendið hefði keypt tvær íbúðir í næsta nágrenni við Önnu.
„Í framhaldi af lestri fréttarinnar í Mannlífi skoðaði ég fréttirnar í Canarian Weekly og fylltist forvitni og fann út að hún hafði komið síðastliðið vor og keypt tvær íbúðir í El Mirador íbúðakjarnanum ofan við barstrikið við Avenida San Francisco og því í einungis 300 metra fjarlægð frá mér.“
Anna segist þó ekki hafa séð téða konu en telji þó öruggt að lögreglan hafi nú þegar handtekið hana, í ljósi þess sem fjölmiðlar virtust vita hvar hún byggi.
„Ég er samt alsaklaus af að hafa hitt þessa 62 ára gömlu konu sem sennilega er frá Preston, ca miðja vegu á milli Blackpool og Blackburn, allavega hefi ég ekki orðið vör við neina með fullt af seðlum á milli handanna á börunum hér í nágrenninu þó að nóg sé af börunum allt í kring. Að auki þykir mér það nokkuð líklegt, úr því að fjölmiðlar vita hvar hún býr, að lögreglan sé búin að skoða málið og handtaka hana og að hún sé komin í dýpstu dýflissur sem fyrirfinnast, ef ekki hér, þá í heimalandinu.“
Að lokum segir Anna að það þýði ekkert að spyrja hana út í glæpakvendið en lofar að læsa útidyrahurðinni þegar hún fari að sofa.
„Semsagt, það þýðir ekkert að spyrja mig um umrædda konu. Ég vildi samt ekki búa ofan við umrætt barstrik, því nægur er hávaðinn sem berst þaðan á kvöldin og yfir til mín í innan við 300 metra fjarlægð. Ég lofa ykkur samt sem hugsið hlýlega til mín yfir hafið, að læsa útidyrahurðinni þegar ég fer að sofa á kvöldin.“
