Nú styttist óðum í áramótin og ákvað Mannlíf að heyra í nokkrum frábærum einstaklingum um uppáhaldsáramót þeirra, hvort viðkomandi ætli að strengja áramótaheit og margt fleira.
Dóra Björt Guðjónsdóttir, borgarfulltrúi Samfylkingarinnar, er ein þeirra sem hefur upplifað áramót við frekar óvenjulegar aðstæður, svo vægt sé til orða tekið.
Hver eru þín eftirminnilegustu áramót?
Eftirminnilegustu áramótin eru áramót sem ég varði í Karasjok allra nyrðst í Noregi við finnsku landamærin. Í Karasjok búa samar og ég dvaldi hjá fjölskyldu norsks vinar míns sem er af samaættum. Eftir tveggja tíma snjósleðaferð á frosnu fljóti í 30 stiga frosti uppgötvuðum við á leiðarenda, þar sem við hugðumst fagna áramótum í litlum rafmagnslausum kofa lengst frá mannabyggðum, að allur bjórinn sem við höfðum meðferðis hafði sprungið og vorum við því að óbreyttu orðin vínlaus, sem ég ætla að viðurkenna að voru ákveðin vonbrigði. En við dóum ekki ráðalaus. Á meðan ég eldaði hamborgarhrygg, sykurbrúnaðar kartöflur og det hele með mjög einföldum eldunartækjum, fóru ferðafélagar mínir á stúfana á snjósleðunum og hugulsamir nágrannar á sveitabæ í um hálftíma fjarlægð sáu sjálfsagt aumur á þeim og gáfu sitthvað til áramótafagnaðarins okkar. Maturinn heppnaðist stórkostlega, en mér tókst reyndar að kveikja örlítið í borðplötu einni á meðan eldamennskunni stóð en það blessaðist sem betur fer. Við spiluðum heilmikið það kvöld, kjöftuðum út í eitt og vorum meira að segja með einhverja flugelda með í för.
Ætlar þú að strengja áramótaheit?
Við maðurinn minn hyggjumst taka upp svokallaðan hamingjusáttmála á ný sem við innleiddum eftir áramótin síðustu en sem fór svolítið forgörðum vegna flutninga og framkvæmda í sumar og haust. Hann gengur út á betri rútínu sem er jú eins og við vitum öll grunnurinn að hamingjunni, eins sexí og það hljómar. Að fara að jafnaði snemma upp í rúm og helst fyrir klukkan tíu því þá gefst góður tími til að lesa og spjalla og ná samt góðum og löngum svefni. Sérstaklega í ljósi þess að einn þriggja ára er ansi duglegur að koma sér á ról ansi árla morguns. Hluti af þessu er líka að hreyfa sig markvissara, enda gefur það góða orku inn í erilsama dagskrá og heldur stjórn á streitunni, sem getur verið nóg af. Einnig að afmarka ákveðinn tíma vikulega fyrir fjölskyldustundir. Nokkrar svona reglur sem skapa góðan ramma fyrir hversdaginn. Við vitum jú að það er hversdagurinn sem leggur grunn að púsluspili lífsins en ekki einhverjar flugeldasýningar og tilfallandi húllumhæ – þó það sé gaman að brjóta upp hversdaginn líka.
Hefur þú gert það áður?
Ég hef margoft ákveðið einhverjar lífstílsúrbætur og tekist vel upp með það, tekið þátt í veganúar nokkrum sinnum sem hefur átt það til að ílengjast fram á vor. Mér tekst yfirleitt vel upp með markmið sem ég set mér ef hugurinn er heilshugar með í því.
Hvað ætlar þú að gera um áramótin?
Planið er að vera með fjölskyldunni allri heima í Grafarvoginum góða og fagna fyrstu áramótunum okkar þar. Við ætlum að verja þeim með systur minni og hennar fjölskyldu og mömmu og pabba. Það er alltaf gott áramótapartí þar sem þessi hópur kemur saman, mikið glimmer, góður matur og trallað fram á nótt. Hver veit nema við skellum okkur á brennu en ég er alin upp við þá hefð. Áramótin eru tækifæri til að sleppa tökum á því gamla sem þjónar okkur ekki lengur og opna faðminn fyrir nýju sem þjónar okkur betur. Þess vegna er þetta alltaf gefandi stund, nýtt og skemmtilegt upphaf. Og það er það sannarlega hjá mér – enda komin í Samfylkinguna og framundan er prófkjör og kosningabarátta. Spennandi tímar í nýjum ham.
