Leikkonan Arna Magnea Danks lenti í mótorhjólaslysi á Sæbraut í Reykjavík á sunnudag og fótbrotnaði illa. Hún þarf að gangast undir tvær aðgerðir vegna meiðslanna.

Arna greindi sjálf frá slysinu í myndbandi á samfélagsmiðlum í gær. Þar lá hún á sjúkrarúmi á Landspítalanum með kærustu sína, Magdalenu Lukasiak, sér við hlið.

Daginn eftir Gleðigönguna var hún á leið með græna mótorhjólið aftur í bílskúr þegar slysið varð á Sæbrautinni.

„Gærdagurinn var æðislegur en í dag var ég að keyra græna hjólinu aftur í bílskúrinn og lenti í slysi,“ sagði Arna í myndbandinu.

Hún sagði vinstri fótlegg sinn hafa brotnað illa og að fram undan væru tvær skurðaðgerðir. Sú fyrri var fyrirhuguð skömmu eftir að myndbandið var tekið en sú síðari eftir nokkrar vikur.

Arna og Magdalena höfðu ætlað að mæta í Trans kirkjuna á sunnudag en slysið kom í veg fyrir það. Þær sendu hinsegin samfélaginu kveðjur frá sjúkrahúsinu og Arna hrósaði jafnframt starfsfólki Landspítalans fyrir umönnunina.

Magdalena þakkaði einnig þeim sem komu þeim til aðstoðar á vettvangi slyssins.