Ástralski leikarinn Julian McMahon er látinn, 56 ára gamall.
Eiginkona hans, Kelly, staðfesti andlátið í yfirlýsingu til Deadline og sagði hann hafa andast á fimmtudag í Clearwater í Flórída eftir leynilega baráttu við krabbamein.
„Með opnu hjarta vil ég deila því með heiminum að ástkær eiginmaður minn, Julian McMahon, lést friðsamlega í þessari viku eftir hetjulega baráttu við krabbamein,“ sagði hún í yfirlýsingunni.
„Julian elskaði lífið. Hann elskaði fjölskyldu sína. Hann elskaði vini sína. Hann elskaði vinnuna sína og hann elskaði aðdáendur sína. Stærsta ósk hans var að færa sem flestum gleði. Við biðjum um stuðning á þessum tíma svo fjölskyldan fái að syrgja í friði. Og við vonum að allir þeir sem Julian færði gleði haldi áfram að finna gleði í lífinu. Við erum þakklát fyrir minningarnar.“
Leikaraferill McMahons hófst árið 1989 þegar hann fékk hlutverk í stuttri ástralskri sápuóperu, The Power, The Passion, áður en hann kom fram í Home and Away. Síðar flutti hann til Bandaríkjanna þar sem hann náði góðum árangri í ýmsum sjónvarpsþáttum.
Hann var ráðinn í Another World árið 1993 og fékk síðan regluleg hlutverk í þáttunum Profiler, Charmed og því hlutverki sem hann er hvað þekktastur fyrir, sem Dr. Christian Troy í þáttunum Nip/Tuck, sem gengu í sex ár.
Í Nip/Tuck, sem fjallar um lýtalækningar, hlaut McMahon tilnefningu til Golden Globe-verðlaunanna fyrir túlkun sína á Dr. Troy.
Nýverið lék hann í áströlsku kvikmyndinni The Surfer, sem var tekin upp í Ástralíu. Meðleikari hans í þeirri mynd var Nicolas Cage.
