Menntasjóður námsmanna hefur höfðað mál fyrir Héraðsdómi Reykjavíkur á hendur íslenskri konu sem er búsett í Ástralíu og krefst þess að hún verði dæmd til að greiða samtals 21.880.753 krónur vegna vangoldins námsláns, auk dráttarvaxta og málskostnaðar.

Sérstökum kafla er varið í tilraunir til að birta konunni stefnuna. Hún er skráð með lögheimili í Ástralíu samkvæmt Þjóðskrá Íslands en ekki hefur tekist að hafa uppi á núverandi heimilisfangi hennar. Menntasjóður lét þýða stefnuna yfir á ensku og óskaði eftir birtingu á grundvelli Haag-samningsins um birtingu réttarskjala, en sú tilraun bar ekki árangur þar sem viðkomandi reyndist ekki búa á skráðu heimilisfangi.

Þá leitaði sjóðurinn einnig aðstoðar íslenskra stjórnvalda og sendiráðs Íslands, en samkvæmt upplýsingum frá áströlskum yfirvöldum er ekki unnt að birta stefnu þegar nákvæmt heimilisfang liggur ekki fyrir. Þar sem engar frekari upplýsingar um búsetu konunnar liggja fyrir var stefnan því birt í Lögbirtingablaðinu.

Málið verður þingfest í Héraðsdómi Reykjavíkur 8. september. Mæti stefnda ekki má hún eiga von á að útivistardómur verði kveðinn upp í málinu.