Átta létust þegar flugvél fórst við afskekkta ratsjárstöð bandaríska flughersins í Alaska á fimmtudag. Enginn komst lífs af úr slysinu.

Flugvélin var á vegum einkaaðila sem starfar fyrir bandaríska herinn og fórst við flugvöll ratsjárstöðvarinnar í Cape Newenham, á suðvesturhluta Alaska. Þetta kemur fram í tilkynningu frá herstjórn Bandaríkjanna í Alaska.

Björgunarsveitir komust að flaki vélarinnar og staðfestu að allir átta sem um borð voru hefðu látist.

Ekki hefur verið upplýst hvaða verkefni fólkið um borð sinnti við ratsjárstöðina. Stöðin er hluti af varnarkerfi Bandaríkjanna og er meðal annars notuð til að fylgjast með flugumferð í lofthelgi Alaska.

Talsmaður herstjórnarinnar sagði rannsókn á orsökum slyssins hafna. Nöfn þeirra sem létust verða ekki birt fyrr en aðstandendum hefur verið tilkynnt um andlát þeirra.

Robert Davis, yfirmaður herstjórnarinnar í Alaska, sagði slysið mikið áfall fyrir samfélagið.

„Þetta er gríðarlegt áfall fyrir hernaðarsamfélag okkar og þau samfélög sem við þjónum,“ sagði Davis.

Hann sagði fólkið sem lést hafa verið reynslumikið fagfólk sem hefði sinnt mikilvægu verkefni við krefjandi aðstæður.