Bandaríska sendiráðið á Íslandi hefur verið gagnrýnt fyrir að deila röð af myndum á Facebook sem varar við hryðjuverkum ef landamæri eru ekki vel varin. Myndirnar vara sérstaklega við hælisleitendum og flóttafólki í Evrópu.

Nýjasta myndin sýnir byssuskot á rúðu veitingastaðar og „Enginn ætti að deyja því að við brugðumst ekki við“ skrifað yfir myndina. „Hryðjuverkamenn þurfa ekki vegabréfsáritanir þegar landamæri eru galopin. Ef við viljum vernda fólkið okkar byrjum við á því að setja strengri lög, framfylgja þeim á skilvirkan hátt og taka þátt í alþjóðlegri samvinnu. Enginn er öruggur án öruggra landamæra, og enginn ætti að deyja því að við brugðumst ekki við,“ stendur í textanum sem fylgir þeirri mynd.

Önnur mynd sýnir kertavöku í Þýskalandi og „Stjórnvöld verða að verja fólkið sitt,“ er skrifað í stórum stöfum yfir myndina. Með myndinni fylgir texti um hættuna sem steðjar frá hælisleitendum. „Fjarlægjum strax synjaða hælisleitendur – áður en eitthvað gerist – afganskur maður, sem var synjað um hæli, réðst á tveggja ára barn og fullorðinn einstakling í þýskum almenningsgarði. Vísa átti honum aftur til Afganistan eftir að umsókn hans um alþjóðlega vernd var hafnað. Þetta var ekki skortur á samúð. Þetta var skortur á framfylgd laga. Evrópsk stjórnvöld verða að vernda fólkið sitt,“ skrifar bandaríska sendiráðið.

Viðbrögðin við færslurnar sýna að skilaboðin séu ekki að sannfæra íslenskan almenning. Margar athugasemdirnar við myndirnar gagnrýna skilaboð sendiráðsins harðlega. Þá sérstaklega hafa margir notendur bent á að harðari landamæragæsla virðist ekki verja íbúa Bandaríkjanna frá byssuárásum í sínu heimalandi af hendi heimamanna.

„Og enginn ætti að vera myrtur í skotárásum vegna heimskulegra laga um eignarhald skotvopna, samt gerist það á hverju ári, margoft, í Bandaríkjunum og þið bregðist ekki við. „Samtals 1.159 fórnarlömb fengu banasár í skotárásum í Bandaríkjunum á milli 1982 og 4. september 2024“,“ skrifar Björgvin Pétursson undir einni færslunni.

„Önnur Facebook færlsa sem mun ekki standast tímans tönn…minni áróður, fleiri myndir af diplómötum að njóta Bláa lónsins og hákarls,“ skrifar Burke Brownfeld.

„Í alvöru? Hvaða starfsmaður sendiráðs hefur þörf til að deila áróðri gegn innflytjendum í einu friðsælasta landi heims? Þessi skilaboð eru sorgleg og niðurlægjandi fyrir Bandaríkjamenn út um allan heim,“ skrifar Matthew Haynsen.

Mannlíf hafði samband við bandaríska sendiráðið en fékk engin svör varðandi þessa samfélagsmiðlaherferð. Þá á Donald Trump, forseti Bandaríkjanna, eftir að skipa nýjan sendiherra í sendiráðið á Íslandi.