Karlmaður hefur verið dæmdur í níu mánaða skilorðsbundið fangelsi fyrir fjársvik og þjófnaði í verslunum á höfuðborgarsvæðinu. Meðal þess sem maðurinn sveik út voru fjölmargar kjúklingavörur og súkkulaði, en hann notaði ódýrari strikamerki við sjálfsafgreiðslukassa til að greiða aðeins brot af raunverulegu verði varanna.
Dómur féll í Héraðsdómi Reykjavíkur 28. september. Maðurinn játaði brot sín skýlaust en alls voru 43 ákærukaflar í málinu. Fallið var frá einum þeirra, sem varðaði skjalafals.
Fyrsta brotið átti sér stað í janúar 2025 þegar maðurinn sveik út Katsu kjúklinga-pokeskál sem kostaði 2.290 krónur. Hann setti strikamerki af vöru sem kostaði aðeins 45 krónur á umbúðirnar og greiddi því 45 krónur fyrir skálina.
Kjúklingur kom ítrekað við sögu næstu vikurnar. Maðurinn sveik meðal annars út Ali Rodizio kjúkling í nokkrum verslunum og voru vörurnar í einstökum tilvikum að verðmæti rúmlega 3.000 krónur. Þá sveik hann út kjúklingabringur og BBQ-kjúklingaspjót. Spjótin kostuðu 7.799 krónur en maðurinn greiddi aðeins 69 krónur fyrir þau með því að nota rangt strikamerki.
Súkkulaði var einnig áberandi í brotahrinunni. Í mars sveik maðurinn út Kinder Delice súkkulaði að verðmæti 798 krónur en greiddi 79 krónur. Hann stal einnig Kinder Maxi súkkulaði í nokkrum tilvikum og í apríl sveik hann út Ferrero súkkulaði sem kostaði 998 krónur með því að nota 79 króna strikamerki.
Listinn yfir vörurnar var þó mun lengri. Þar má meðal annars finna brauð, skyr, ost, kaffi, kartöflur, pekanhnetur, appelsínusafa, pítusósu, egg, orkudrykki, fæðubótarefni og bílahleðslur.
Samkvæmt dóminum hafði maðurinn ekki áður gerst sekur um refsivert brot svo kunnugt væri. Hann játaði brotin, lýsti iðrun og hafði greitt bótakröfu að fjárhæð 61.202 krónur að fullu.
Dómurinn taldi níu mánaða fangelsi hæfilega refsingu með hliðsjón af fjölda brotanna og fjárhæðunum. Fullnustu refsingarinnar var hins vegar frestað og fellur hún niður eftir tvö ár haldi maðurinn almennt skilorð.
Honum var jafnframt gert að greiða rúmlega eina milljón króna í málsvarnarþóknun verjanda síns.
