Þrír háttsettir dómarar hafa komist að þeirri niðurstöðu að bann við starfsemi Palestine Action-samtakanna samkvæmt hryðjuverkalögum hafi verið óhóflegt og ólögmætt. Bannið, sem sett var á af forvera innanríkisráðherra Bretlands Yvette Cooper, brýtur gegn tjáningar- og samkomufrelsi.

Núverandi innanríkisráðherra, Shabana Mahmood, segist þó ætla að áfrýja niðurstöðunni. Í millitíðinni ríkir lagaleg óvissa um framtíð rúmlega 2.500 einstaklinga sem hafa verið handteknir fyrir að sýna stuðning við samtökin.

Dómararnir, undir forystu Lafði Victoriu Sharp, sögðu að bannið yrði ekki formlega fellt úr gildi fyrr en báðir aðilar hefðu fengið tækifæri til að koma sjónarmiðum sínum á framfæri. Metropolitan Police hefur í kjölfarið stöðvað tafarlausar handtökur vegna stuðnings við Palestine Action, en heldur áfram að safna gögnum fyrir mögulegar ákærur síðar.

Huda Ammori, einn stofnenda samtakanna, kallaði niðurstöðuna „sigur sem skiptir sköpum“. Hún sagði:

„Við vorum bönnuð vegna þess að aðgerðir Palestine Action gegn stærsta vopnaframleiðanda Ísraels, Elbit Systems, kostuðu fyrirtækið milljónir punda í tap og urðu til þess að það missti af margra milljarða punda samningum.“

Dómararnir töldu að aðeins mjög lítill hluti starfsemi Palestine Action félli undir skilgreiningu hryðjuverka og að almenn hegningarlög væru nægjanleg til að takast á við refsiverða háttsemi.

Sérstakur skýrslugjafi Sameinuðu þjóðanna, Ben Saul, ásamt Amnesty International UK og Liberty, hafa hvatt stjórnvöld til að virða dóminn.

Mahmood sagði hins vegar í dag:

„Ég er vonsvikin yfir niðurstöðu dómsins og er ósammála því að bannið sé óhóflegt. […] Ég hyggst berjast gegn þessum dómi fyrir áfrýjunardómstól.“