Lögreglan á spænsku eyjunni Fuerteventura (Guardia Civil) hefur handtekið mann eftir stórfurðulegt innbrot í verslun í ferðamannabænum Corralejo. Þjófurinn reyndi að fela auðkenni sitt með því að klæðast grímu teiknimyndasöguhetjunnar Batman, en sú ákvörðun virtist fremur vinna gegn honum en með.
Innbrotið átti sér stað snemma morguns mánudaginn 12. ágúst síðastliðinn. Samkvæmt upplýsingum frá lögreglu braut maðurinn glerhurð á inngangi verslunarinnar og hafði á brott með sér peningakassa sem innihélt um 500 evrur í reiðufé, eða tæpar 75 þúsund íslenskar krónur. Við innbrotið olli hann jafnframt talsverðum skemmdum á húsnæðinu, sem metnar eru á tæpar 112 þúsund krónur (€750).
Batman á öryggismyndavélum
Myndefni úr öryggismyndavélum verslunarinnar reyndist lögreglunni lykillinn að lausn málsins. Á upptökunum sást innbrotsþjófurinn greinilega klæddur Batman-grímu. Þótt andlitið væri falið þá vakti fatnaður hans mikla athygli rannsakenda, en maðurinn var í okurgulum (gulleit hálfbrúnum) buxum, svartri hettupeysu og í svörtum stígvélum.
Lögreglumenn áttu ekki í miklum vandræðum með að staðsetja mann í bænum sem klæddist nákvæmlega eins fötum og sást til á upptökunum.
Vísaði lögreglunni á felustaðinn
Eftir að maðurinn var handtekinn viðurkenndi hann brotið og leiddi lögregluna á staðinn þar sem hann hafði falið Batman-grímuna og hamarinn sem hann notaði til að brjóta glerhurðina.
Lögreglunni tókst einnig að endurheimta peningakassann sjálfan og rúmlega helminginn af stolna fénu, eða um 253 evrur. Maðurinn hefur nú verið kærður fyrir innbrot og var fluttur fyrir dómstól í héraðshöfuðborginni Puerto del Rosario þar sem málið verður tekið fyrir.
