Birkir Þór Guðmundsson hefur verið dæmdur í fimm mánaða skilorðsbundið fangelsi í Héraðsdómi Reykjaness fyrir líkamsárás gegn fyrrverandi kærustu sinni og akstur undir áhrifum kannabisefna.

Samkvæmt dóminum ók Birkir bifreið í Garðabæ 11. júní 2025 þrátt fyrir að vera óhæfur til aksturs vegna áhrifa fíkniefna.

Auk þess játaði hann að hafa í tvígang ráðist á fyrrverandi kærustu sína á heimili hennar í Reykjavík í lok maí 2024. Fyrra atvikið fólst meðal annars í því að hann lyfti henni upp, kastaði henni í gólfið og sló hana í öxl. Morguninn eftir réðst hann aftur á hana, sló hana ítrekað í höfuð og andlit og tók hana hálstaki þannig að hún missti andann.

Konan hlaut meðal annars blóðnasir, mar á öxl, hendi og brjóstkassa, áverka á hálsi og nefi, auk tognunar í kjálka.

Við ákvörðun refsingar leit dómurinn meðal annars til þess að Birkir hafði áður hlotið þriggja mánaða skilorðsbundinn fangelsisdóm fyrir peningaþvætti, brot gegn fíkniefna- og lyfjalögum. Akstur undir áhrifum fíkniefna var framinn á skilorðstíma þess dóms og því var fyrri refsing tekin upp við ákvörðun refsingar í málinu.

Dómurinn taldi Birki hafa sýnt iðrun og tekið ábyrgð á háttsemi sinni með skýlausum játningum. Þrátt fyrir það var litið alvarlegum augum á að hann hefði beitt fyrrverandi kærustu sína ítrekuðu ofbeldi á heimili hennar þar sem barnung dóttir hennar var einnig stödd.

Auk miskabótanna var Birki gert að greiða brotaþola 250 þúsund krónur í málskostnað og rúmlega 630 þúsund krónur í sakarkostnað. Þá var hann sviptur ökurétti í 18 mánuði, gert að greiða 200 þúsund króna sekt