Matvælastofnun (MAST) tók á undanförnum fjórum mánuðum fjölda stjórnvaldsákvarðana í dýravelferðarmálum, þar á meðal vörslusviptingar, dagsektir, stjórnvaldssektir og kæru til lögreglu vegna meintra brota gegn dýravelferðarlögum.
Samkvæmt samantekt stofnunarinnar voru fjölmargir einstaklingar sviptir vörslum dýra vegna vanrækslu eða ófullnægjandi aðbúnaðar. Í febrúar voru meðal annars tekin afskipti af katta- og hundaeigendum vegna óviðunandi heimilisaðstæðna, auk þess sem umráðamaður stórs hrossahóps var sviptur vörslum vegna ófullnægjandi fóðrunar.
Í mars var einstaklingur sviptur vörslum fjölda gæludýra, þar á meðal hunda, katta, fugla og skrautfiska, þar sem hann þótti ekki ráða við umhirðu þeirra. Þá var ákveðið að svipta sauðfjárbónda vörslum alls sauðfjár vegna endurtekinna brota á velferð dýranna. Sú ákvörðun tekur gildi 1. október hafi bóndinn ekki ráðstafað fénu sjálfur fyrir þann tíma.
Í apríl voru tveir kattaeigendur bæði sviptir vörslum dýranna og sektaðir. Í öðru tilvikinu hafði eigandi skilið læðu og kettlinga eftir eftirlitslausa án nægilegs fóðurs og vatns, en í hinu voru kettir geymdir utandyra í búri án aðgangs að fóðri og vatni. Sektirnar námu 144 þúsund og 162 þúsund krónum.
Sama mánuð var umráðamaður stórrar hrossahjarðar sviptur vörslum vegna vanræktrar fóðrunar og brynningar auk þess sem MAST lét framkvæma úrbætur á aðbúnaði hrossa á kostnað eiganda vegna vanræktrar hófhirðu og slysahættu í umhverfi þeirra.
Í maí var sauðfjárbóndi sektaður um 286 þúsund krónur fyrir að hafa aflífað tvær kindur án þess að svipta þær meðvitund fyrst, eins og lög gera ráð fyrir. Þá kærði MAST nautgripabónda til lögreglu eftir að ábendingar bárust um barsmíðar á kúm og kvígum.
Einnig voru lagðar dagsektir á búfjáreigendur vegna brota á velferð nautgripa og sauðfjár. Í einu tilviki var ákveðið að svipta umráðamann hluta nautgripa sinna vegna endurtekinna brota á velferð þeirra. Sú vörslusvipting tekur gildi 1. september næstkomandi hafi gripunum ekki verið ráðstafað áður.
