Breski söngvarinn Boy George hefur dregið sig úr sýningum á söngleiknum Jesus Christ Superstar í West End í Lundúnum eftir harða gagnrýni sem fylgdi útgáfu nýs lags þar sem hann lýsir yfir stuðningi við Ísrael.
Fyrr í vikunni gaf fyrrverandi söngvari Culture Club út lagið We Will Dance Again. Í laginu gagnrýnir hann meðal annars þá sem hafa lýst yfir stuðningi við Palestínu og segir í upphafslínu þess: „Þú segir þjóðarmorð, ég segi stríð. Þegar ráðist er á þig, þá er herinn til þess.“
Síðar í laginu viðurkennir hann að hernaðaraðgerðir Ísraels hafi orðið „ljótar“, en segir jafnframt að þær skýrist af því að „þið viljið drepa hvern einasta okkar“, með vísan til gyðinga sem búa í Ísrael.
Útgáfa lagsins vakti hörð viðbrögð og í kjölfarið tilkynnti umboðsmaður Boy George, Paul Kemsley, að söngvarinn myndi ekki koma fram í Jesus Christ Superstar eins og til stóð.
Boy George átti að fara með hlutverk Heródesar konungs frá 3. til 15. ágúst.
„Ákvörðunin var tekin af fyllstu virðingu fyrir framleiðendum, listræna teyminu og öllum sem koma að sýningunni,“ skrifaði Kemsley á Instagram.
Hann sagði Boy George aldrei hafa óttast að standa með eigin sannfæringu en að það væri jafnframt hlutverk sitt að taka ákvarðanir sem væru bæði listamanninum og öðrum fyrir bestu.
„Í þessu tilviki taldi ég rétt að stíga til hliðar þannig að athyglin beindist áfram að sýningunni og að allir gætu haldið áfram í gagnkvæmri virðingu og góðum anda,“ sagði hann.
Kemsley bað jafnframt aðdáendur afsökunar sem höfðu keypt miða sérstaklega til að sjá Boy George á sviði.
Í laginu gagnrýnir Boy George einnig tónlistarmenn á borð við Kneecap, Stormzy og Clairo fyrir stuðning sinn við Palestínu og sakar þá um að fylgja straumnum.
Hann vísar einnig til árásar Hamas á Nova-tónlistarhátíðina 7. október 2023 og syngur meðal annars að fólk hafi þagað um þá árás og fordæmt gyðinga með „sértæku minni“ og áróðri sem hafi breiðst út á internetinu.
Laginu lýkur á orðunum:
„Treystu mér, við munum dansa aftur … og þá verður ekkert stríð. En ef þú ert enn í vafa, þá stend ég með gyðingum. Ég tel mig ekki hugrakkan, ég þarf bara að haga mér eins og manneskja.“
