Leikarinn Bryan Cranston er harmi sleginn eftir andlát RJ Mitte, sem lék son hans í sjónvarpsþáttunum Breaking Bad. Cranston segist vera í mikilli örvæntingu vegna fráfalls leikarans.

Cranston birti mynd af þeim saman á samfélagsmiðlum og skrifaði einlæga kveðju.

„Ég er í mikilli örvæntingu þegar ég skrifa þetta í kvöld. RJ Mitte, elsku sonur minn í Breaking Bad, er látinn,“ skrifaði hann.

Cranston rifjaði upp þegar hann kynntist Mitte, sem þá var aðeins 14 ára gamall. Hann hrósaði honum fyrir þrautseigju og einbeitni, ekki síst í ljósi þess að Mitte var með heilalömun. Hann lýsti jafnframt stolti yfir því að hafa fylgst með honum vaxa úr grasi á tökustað þáttanna og verða að hæfileikaríkum leikara og talsmanni réttinda fatlaðs fólks.

„Hann var ein af stjörnum vinsælla sjónvarpsþátta, en var samt bara krakki,“ skrifaði Cranston.

Leikarinn sagði að þeir hefðu verið í skilaboðasamskiptum fyrir aðeins nokkrum vikum og rætt um að hittast í hádegismat. Hann væri miður sín yfir því að þau áform yrðu aldrei að veruleika.

„Ég veit að ég elskaði hann … Ég mun sakna þín, sonur minn,“ skrifaði Cranston.

Mitte, sem var þekktastur fyrir hlutverk Walter White yngri í vinsælu þáttaröðinni á sjónvarpsstöðinni AMC, lést 34 ára að aldri, samkvæmt frétt TMZ. Heimildarmenn miðilsins segja að hann hafi svipt sig lífi. Yfirvöld rannsaka andlátið enn.

Mitte lét einnig til sín taka utan leiklistarinnar og barðist fyrir auknum réttindum fatlaðs fólks í skemmtanaiðnaðinum. Hann nýtti frægð sína til að vekja athygli á mikilvægi þess að fatlað fólk fengi aukið rými og betri fulltrúa í kvikmyndum og sjónvarpi.

Hlaðvarpsstjórnandinn Joe Vulpis, sem hitti Mitte nokkrum vikum fyrir andlát hans, sagði við TMZ að leikarinn hefði verið „afar jákvæður“ og einn vingjarnlegasti og einlægasti maður sem hann hefði átt samtal við.

Cranston lauk kveðju sinni með því að hvetja fólk sem glímir við sjálfsvígshugsanir til að leita sér hjálpar hjá bandarísku stuðningslínunni 988 Suicide & Crisis Lifeline.